Egis naýqany aldynda Jetisý oblysy aýyl sharýashylyǵy daqyldarynyń egistikke qajetti tuqym kólemimen qamtamasyz etilgen.
Onyń kólemi 56,2 myń tonnany quraidy, sonyń ishinde 1,8 myń tonnasy elitalyq, 54,4 myń tonnasy joǵary reprodýktsiialy tuqym.
Mundaǵy otandyq tuqymdardyń úlesi 13% qurady. Aǵymdaǵy jyly óńirdegi aýyl sharýashylyǵy daqyldarynyń egistik alqaby 1,9 myń gektarǵa artyp, 519 myń gektarǵa jetkizildi.
Oblystyq aýyl sharýashylyǵy basqarmasynyń málimetine sáikes, egistik alqaptaryn ártaraptandyrý jospary aiasynda basymdyq beriletin daqyldardyń, atap aitqanda qant qyzylshasynyń kólemi 2 esege, júgeri – 15%, kókónister men kartoptyń kólemi 2%-ǵa ósti.
– Óńirdiń attestattalǵan tuqym sharýashylyqtary 6,3 myń tonna elitalyq jáne joǵary ónimdi masaqty dándi daqyldar tuqymyn, 941 tonna júgeri tuqymyn, 5 tonna qant qyzylshasy tuqymyn, 14 tonna kúnbaǵys tuqymyn ázirleidi jáne ol tuqymdardy aýyl sharýashylyǵy taýar óndirýshilerine sortty jańartý úshin ótkizedi.
Sondai-aq, 4 attestattalǵan tuqym satýshy sharýashylyqtardyń ótinimderine sáikes olardy qajetti sheteldik tuqymdarmen qamtamasyz etedi.
Sondai-aq, aldaǵy ýaqytta kartop tuqymdary men burshaq daqyldaryn óndirýdi ulǵaitý baǵytynda jańa tuqym sharýashylyqtarynyń qyzmetin damytý josparlanýda, – dep atap ótti oblystyq aýyl sharýashylyǵy basqarmasynda.
Aita ketsek, aǵymdaǵy jyldyń 5 aiynda óńirdegi aýyl sharýashylyǵynyń jalpy ónim kólemi 70,4 mlrd teńgege jetti, NKI – 101,5%. Jalpy, jyl qorytyndysy boiynsha bul kórsetkishti 544 mlrd teńgege deiin jetkizý josparlanýda.
Bul rette aǵymdaǵy jyly oblystyń aýyl sharýashylyǵy salasyn damytýǵa biýdjetten 45,6 mlrd teńge bólindi.
