Jetisý oblysy Tótenshe jaǵdaılar departamentinde qurylymdyq, vedimistik jáne aýmaqtyq bólimshelerdiń basshylary men ınspektorlarynyń qatysýymen semınar-keńes ótti. Kezdesý «Azamattyq qorǵaý organdaryndaǵy sybaılas jemqorlyqqa qarsy kúres jáne qoǵamda zań men tártip ıdeologıasyn ilgeriletý jónindegi 2025–2030 jyldarǵa arnalǵan tujyrymdama» taqyrybyna arnaldy,- dep habarlaıdy Dalanews.kz

İs-sharany azamattyq qorǵaý polkovnıgi, departament bastyǵynyń birinshi orynbasary A. Orazalınov ashyp, aldyn alý mádenıetin kúsheıtý, kadrlyq tártip pen qyzmettik ádep talaptaryn múltiksiz saqtaý — qaýipsizdik salasyndaǵy senimniń basty sharty ekenin atap ótti. Ol sondaı-aq ár bólimsheniń ishki baqylaý tetikterin jetildirý, táýekel aımaqtaryn der kezinde anyqtaý jáne ashyq komýnıkasıany júıeleý boıynsha naqty mindetter qoıdy.

QR Memlekettik qyzmet isteri agenttiginiń Jetisý oblysy boıynsha departamentiniń bas mamany N. Súleımenov sybaılas jemqorlyq táýekelderin baǵalaý ádistemesin, múddeler qaqtyǵysyn basqarý, deklarasıalaý men syılyqtar esebi tártibin túsindirip, praktıkalyq keıster usyndy. Al Jetisý oblysy Polısıa departamentiniń JPB polısıa podpolkovnıgi D. Smakov quqyq buzýshylyqtardyń aldyn alý, qyzmetkerlerdiń jaýapkershiligin arttyrý jáne azamattarmen seriktestik ornatýdyń quqyqtyq negizderine toqtaldy.

Talqylaý qorytyndysynda qatysýshylar 2025–2030 jyldarǵa arnalǵan jol kartasynyń jobasyn naqtylady: qundylyqqa negizdelgen oqytý modýlderin engizý, etıkalyq ombýdsmen ınstıtýtynyń jumysyn jandandyrý, «ashyq esik» formatyndaǵy kezdesýlerdi turaqty ótkizý jáne anonımdi keri baılanys arnalaryn keńeıtý.

Semınar-keńes Jetisý qutqarýshylary úshin adal qyzmet pen zań ústemdigine negizdelgen korporatıvti mádenıetti júıeli túrde qalyptastyrýdyń mańyzdy qadamy boldy.