Jetisý oblysynda Qazaqstan halqynyń birligi merekesi keń kólemde atalyp ótildi. Oblys ortalyǵyndaǵy merekelik shara 250 adam qatysqan «Birlik jarysy» marafonymen bastaldy. Osy kúni Taldyqorǵandaǵy «Jastar» saiabaǵynda túrli kórmeler, jarystar, kontserttik baǵdarlamalar uiymdastyryldy,- dep habarlaidy Dalanews.kz
Merekelik sharaǵa jinalǵan kópshilikti quttyqtaǵan oblys ákimi Beibit Isabaev bul merekeniń el birligin nyǵaitýdaǵy mańyzyna toqtalyp, Qazaqstan halqy Assambleiasynyń el ómirindegi rólin de atap ótti.
- Ǵasyrlar boiy Jetisýda taǵdyr toǵystyrǵan barsha etnos pen ulys ortaq tarihyn tanyp, birtutas dúnietanymyn qalyptastyrdy. Qazaqstan halqy Assambleiasy 30 jyl ishinde saliqaly mámile alańy, mádeni almasýlar ortalyǵy, qoǵamdy uiystyrýshy qurylym retinde ózin berik ornyqtyrdy. Búgingidei is-sharalar beibit te berekeli ómirdiń baǵasyn uǵýǵa, ony kózdiń qarashyǵyndai saqtaýǵa yqpal etip, qoǵamdyq kelisimdi nyǵaitýdaǵy jańa mindetterdi iske asyrýǵa tyń serpin beredi dep senemiz, - degen oblys basshysy kópshilikke izgi tilegin jetkizdi.
Jinalǵan kópshilikke qazaq, orys, tatar, kúrd, nemis t.b. etnostardyń qoǵamdyq birlestikteri óz ulttyq mádenietimen tanystyratyn kórmelerin usyndy. Solardyń biri «Týǵan tel» tatar mádeni ortalyǵy da merekege barynsha daiyndalǵan.
- Búgin biz kórmege ulttyq buiymdarymyzdy, chak-chak, ýshbýshmak, bálish siiaqty kóptegen taǵamdarymyzdy alyp keldi. Birlik kúni – biz úshin asa mańyzdy mereke. Beibitshilik, tatýlyq pen turaqtylyq – eń úlken bailyǵymyz. Sondyqtan árqashan osy berekeli ómirimizdi baǵalai bilýimiz kerek jáne soǵan árdaiym úles qosamyz, - deidi ortalyqtyń belsendi múshesi Kevstariia Iaýsheva.
Merekeni tamashalaýǵa kelgen jastar da kóp. Solardyń ishinen I.Jansúgirov atyndaǵy Jetisý ýniversitetiniń 1 kýrs stýdenti Ámina Malǵajdarova óz pikirin bildirdi.
- Búgin merekelik sharany kórýge saiabaqqa qurbylarymmen birge keldik. Oblysta turatyn túrli etnostardyń daiyndaǵan kórmelerinen olardyń mýzykalyq aspaptaryn, taǵamdaryn, qolóner buiymdaryn kórip, tamashaladyq. Tarihi otandaryn tanystyratyn túrli kitapshalary da qoiylǵan. Biz bir-birimizdi tanyp-bilý arqyly tatýlyǵymyzdy saqtaimyz. Sol úshin osyndai sharalar qajet dep oilaimyn. Mereke kóńildi ótip jatyr, - deidi ol.
Sol siiaqty saiabaq sahnasynda jergilikti óner ujymdary «Tatýlyq tańy atqan kún» atty kontserttik baǵdarlamasyn usyndy.
Atap ótsek, osy kúni «Birlik júgirisi» sporttyq sharasy ótkizilip, Dostyq úiinen «Jastar» sport saraiyna deiin 250-dei adam júgirip ótti. Merekelik marafonnyń jeńimpazdary men belsendi qatysýshylaryna arnaiy diplomdar, madaqtamalar, estelik syilyqtar tabystalady.
Eske salsaq, mundai merekelik sharalar oblystyń barlyq aýdan-ualalarynda ótýde.
