جەتىسۋ وبلىسىندا قازاقستان حالقىنىڭ بىرلىگى مەرەكەسى كەڭ كولەمدە اتالىپ ءوتىلدى. وبلىس ورتالىعىنداعى مەرەكەلىك شارا 250 ادام قاتىسقان «بىرلىك جارىسى» مارافونىمەن باستالدى. وسى كۇنى تالدىقورعانداعى «جاستار» ساياباعىندا ءتۇرلى كورمەلەر، جارىستار، كونسەرتتىك باعدارلامالار ۇيىمداستىرىلدى،- دەپ حابارلايدى Dalanews.kz
مەرەكەلىك شاراعا جينالعان كوپشىلىكتى قۇتتىقتاعان وبلىس اكىمى بەيبىت يسابايەۆ بۇل مەرەكەنىڭ ەل بىرلىگىن نىعايتۋداعى ماڭىزىنا توقتالىپ، قازاقستان حالقى اسسامبلەياسىنىڭ ەل ومىرىندەگى ءرولىن دە اتاپ ءوتتى.
- عاسىرلار بويى جەتىسۋدا تاعدىر توعىستىرعان بارشا ەتنوس پەن ۇلىس ورتاق تاريحىن تانىپ، ءبىرتۇتاس دۇنيەتانىمىن قالىپتاستىردى. قازاقستان حالقى اسسامبلەياسى 30 جىل ىشىندە ساليقالى مامىلە الاڭى، مادەني الماسۋلار ورتالىعى، قوعامدى ۇيىستىرۋشى قۇرىلىم رەتىندە ءوزىن بەرىك ورنىقتىردى. بۇگىنگىدەي ءىس-شارالار بەيبىت تە بەرەكەلى ءومىردىڭ باعاسىن ۇعۋعا، ونى كوزدىڭ قاراشىعىنداي ساقتاۋعا ىقپال ەتىپ، قوعامدىق كەلىسىمدى نىعايتۋداعى جاڭا مىندەتتەردى ىسكە اسىرۋعا تىڭ سەرپىن بەرەدى دەپ سەنەمىز، - دەگەن وبلىس باسشىسى كوپشىلىككە ىزگى تىلەگىن جەتكىزدى.
جينالعان كوپشىلىككە قازاق، ورىس، تاتار، كۇرد، نەمىس ت.ب. ەتنوستاردىڭ قوعامدىق بىرلەستىكتەرى ءوز ۇلتتىق مادەنيەتىمەن تانىستىراتىن كورمەلەرىن ۇسىندى. سولاردىڭ ءبىرى «تۋعان تەل» تاتار مادەني ورتالىعى دا مەرەكەگە بارىنشا دايىندالعان.
- بۇگىن ءبىز كورمەگە ۇلتتىق بۇيىمدارىمىزدى، چاك-چاك، ۋشبۋشماك، ءبالىش سياقتى كوپتەگەن تاعامدارىمىزدى الىپ كەلدى. بىرلىك كۇنى – ءبىز ءۇشىن اسا ماڭىزدى مەرەكە. بەيبىتشىلىك، تاتۋلىق پەن تۇراقتىلىق – ەڭ ۇلكەن بايلىعىمىز. سوندىقتان ءارقاشان وسى بەرەكەلى ءومىرىمىزدى باعالاي ءبىلۋىمىز كەرەك جانە سوعان ءاردايىم ۇلەس قوسامىز، - دەيدى ورتالىقتىڭ بەلسەندى مۇشەسى كيەۆستاريا ياۋشيەۆا.
مەرەكەنى تاماشالاۋعا كەلگەن جاستار دا كوپ. سولاردىڭ ىشىنەن ءى.جانسۇگىروۆ اتىنداعى جەتىسۋ ۋنيۆەرسيتەتىنىڭ 1 كۋرس ستۋدەنتى ءامينا مالعاجداروۆا ءوز پىكىرىن ءبىلدىردى.
- بۇگىن مەرەكەلىك شارانى كورۋگە ساياباققا قۇربىلارىممەن بىرگە كەلدىك. وبلىستا تۇراتىن ءتۇرلى ەتنوستاردىڭ دايىنداعان كورمەلەرىنەن ولاردىڭ مۋزىكالىق اسپاپتارىن، تاعامدارىن، قولونەر بۇيىمدارىن كورىپ، تاماشالادىق. تاريحي وتاندارىن تانىستىراتىن ءتۇرلى كىتاپشالارى دا قويىلعان. ءبىز ءبىر-بىرىمىزدى ءتانىپ-بىلۋ ارقىلى تاتۋلىعىمىزدى ساقتايمىز. سول ءۇشىن وسىنداي شارالار قاجەت دەپ ويلايمىن. مەرەكە كوڭىلدى ءوتىپ جاتىر، - دەيدى ول.
سول سياقتى ساياباق ساحناسىندا جەرگىلىكتى ونەر ۇجىمدارى «تاتۋلىق تاڭى اتقان كۇن» اتتى كونسەرتتىك باعدارلاماسىن ۇسىندى.
اتاپ وتسەك، وسى كۇنى «بىرلىك جۇگىرىسى» سپورتتىق شاراسى وتكىزىلىپ، دوستىق ۇيىنەن «جاستار» سپورت سارايىنا دەيىن 250-دەي ادام جۇگىرىپ ءوتتى. مەرەكەلىك مارافوننىڭ جەڭىمپازدارى مەن بەلسەندى قاتىسۋشىلارىنا ارنايى ديپلومدار، ماداقتامالار، ەستەلىك سىيلىقتار تابىستالادى.
ەسكە سالساق، مۇنداي مەرەكەلىك شارالار وبلىستىڭ بارلىق اۋدان-ۇالالارىندا وتۋدە.
