Jetisý oblysynda biyl aýyl sharýashylyǵy daqyldarynyń egis alqabyn 510,7 myń gektarǵa jetkizý josparlanyp otyr. Qazir kóktemgi dala jumystary belsendi júrgizilýde. Búgin óńirdegi egis naýqanymen tanysý barysynda oblys ákimi Beibit Isabaev egin egý jumystaryna qarqyndy kirisken sharýashylyqtardyń biri «Táýelsizdik Agro» JShS-nyń alqabynda boldy, dep habarlaidy Dalanews.kz
Kóksý aýdanyndaǵy alqap basynda seriktestik basshysymen tildesken oblys ákimi kóktemgi dala jumystarynyń jai-kúii, sharýashylyqtyń materialdyq-tehnikalyq bazasy, jumysshylardyń jaǵdaiy jaily surap bildi. Seriktestik direktory Rahim Karimovtyń aitýynsha, Kóksý aýdanyndaǵy bul sharýashylyqta 15 adam jumys isteidi. Kóktemgi dala jumystaryn ýaqytyly, ári sapaly atqarýǵa memleket tarapynan beriletin sýbsidiialar, jeńildikti nesieler oń yqpal etken. Máselen, ol arnaiy egis naýqanyna «Keń dala» baǵdarlamasymen 5% jeńildetilgen nesie alyp, sol qarjylandyrýdyń arqasynda qazir alqapta jumystar toqtaýsyz júrip jatqanyn aitady. Ótken jyly «QazAgroQarjy» AQ arqyly lizingige otandyq 5 jańa tehnika satyp alǵan.
- Aýyl sharýashylyǵymen ainalysyp júrgenime 25 jyldan asty. Qazir biz turǵan alqapqa ótken jyly qant qyzylshasyn ekkenbiz. Biyl aýyspaly egis talabyna sai bul 100 gektar jerge júgeri egemiz. Jalpy biz sútti baǵyttaǵy asyl tuqymdy iri qara ósirýmen ainalysqandyqtan, negizgi basymdyqty mal azyǵy daqyldaryna berip otyrmyz. Máselen, osy Kóksý aýdanyndaǵy 300 gektar jerdiń 100 gektaryna júgeri, 100 gektaryna jońyshqa, 100 gektaryna soia egemiz, - deidi seriktestik direktory Rahim Karimov.
Osy oraida Beibit Isabaev memlekettiń agroónerkásipti damytý saiasatynda aýyl sharýashylyǵyndaǵy sharýa qojalyqtarynyń birshama aiaqqa turyp, ekonomikalyq jaǵdaiy jaqsarǵannan keiin sýbsidiia azaitylyp, jeńildikpen beriletin nesiege birtindep kóshýge basymdyq beriletinin aitty. Bul qarajattyń da, jerdiń de barynsha tiimdi paidalanylýyna yqpal etetin shara bolmaq.
Jalpy Jetisý oblysynda aýyl sharýashylyǵy daqyldarynyń egis alqabyn biyl 510,7 myń gektarǵa jetkizý josparlanyp otyr. Búgingi kúnge, 60,1 myń gektar súdigerdiń ylǵaly jabyldy, 40,5 myń gektar kúzdik daqyldar men kópjyldyq shópter tyrmalanyp, 35,7 myń gektar jer jyrtyldy. Josparlanǵan 378 myń gektardyń 6,3 myń gektaryna aýyl sharýashylyǵy daqyldary sebildi.
