Жетісу облысында биыл ауыл шаруашылығы дақылдарының егіс алқабын 510,7 мың гектарға жеткізу жоспарланып отыр. Қазір көктемгі дала жұмыстары белсенді жүргізілуде. Бүгін өңірдегі егіс науқанымен танысу барысында облыс әкімі Бейбіт Исабаев егін егу жұмыстарына қарқынды кіріскен шаруашылықтардың бірі «Тәуелсіздік Агро» ЖШС-ның алқабында болды, деп хабарлайды Dalanews.kz

Көксу ауданындағы алқап басында серіктестік басшысымен тілдескен облыс әкімі көктемгі дала жұмыстарының жай-күйі, шаруашылықтың материалдық-техникалық базасы, жұмысшылардың жағдайы жайлы сұрап білді. Серіктестік директоры Рахим Каримовтың айтуынша, Көксу ауданындағы бұл шаруашылықта 15 адам жұмыс істейді. Көктемгі дала жұмыстарын уақытылы, әрі сапалы атқаруға мемлекет тарапынан берілетін субсидиялар, жеңілдікті несиелер оң ықпал еткен. Мәселен, ол арнайы егіс науқанына «Кең дала» бағдарламасымен 5% жеңілдетілген несие алып, сол қаржыландырудың арқасында қазір алқапта жұмыстар тоқтаусыз жүріп жатқанын айтады. Өткен жылы «ҚазАгроҚаржы» АҚ арқылы лизингіге отандық 5 жаңа техника сатып алған.

- Ауыл шаруашылығымен айналысып жүргеніме 25 жылдан асты. Қазір біз тұрған алқапқа өткен жылы қант қызылшасын еккенбіз. Биыл ауыспалы егіс талабына сай бұл 100 гектар жерге жүгері егеміз. Жалпы біз сүтті бағыттағы асыл тұқымды ірі қара өсірумен айналысқандықтан, негізгі басымдықты мал азығы дақылдарына беріп отырмыз. Мәселен, осы Көксу ауданындағы 300 гектар жердің 100 гектарына жүгері, 100 гектарына жоңышқа, 100 гектарына соя егеміз, - дейді серіктестік директоры Рахим Каримов.

Осы орайда Бейбіт Исабаев мемлекеттің агроөнеркәсіпті дамыту саясатында ауыл шаруашылығындағы шаруа қожалықтарының біршама аяққа тұрып, экономикалық жағдайы жақсарғаннан кейін субсидия азайтылып, жеңілдікпен берілетін несиеге біртіндеп көшуге басымдық берілетінін айтты. Бұл қаражаттың да, жердің де барынша тиімді пайдаланылуына ықпал ететін шара болмақ.   

Жалпы Жетісу облысында ауыл шаруашылығы дақылдарының егіс алқабын биыл 510,7 мың гектарға жеткізу жоспарланып отыр. Бүгінгі күнге, 60,1 мың гектар сүдігердің ылғалы жабылды, 40,5 мың гектар күздік дақылдар мен көпжылдық шөптер тырмаланып, 35,7 мың гектар жер жыртылды. Жоспарланған 378 мың гектардың 6,3 мың гектарына ауыл шаруашылығы дақылдары себілді.