Attyń qulaǵynda oinaityn jigitterdiń jetistigi tek qana Jetisýdyń emes, búkil qazaq eliniń abyroiy, ulttyq sportty álemge áigileitin jarys ekendigin aitqan Beibit Óksikbaiuly:
– Sizder baba jolyn jańǵyrtyp qaittyńyzdar. Jaýgershilik zamanda el basyna kún týǵanda batyrlar atqa qonyp, myńdaǵan shaqyrym jer júretin. Sondai urpaq áli de bar ekendigin dáleldedińizder.
Bul tek jarys emes, onyń astarynda uly murattar jatyr. Ulttyń salt-dástúri, qundylyqtary bar. Sondyqtan sporttyq sheberlikterińizdi shyńdai berińizder, jetistikterińiz kóbeisin, – dep jalpy oblysta ulttyq sportqa laiyqty kóńil bólinip jatqanyn baian etti.
Saltanaty jarasqan jiynda sóz alǵan komandanyń aǵa jattyqtyrýshysy Rústem Dosjanov:
– Osy jarysqa bizdi kóksýlyq jerlesterimiz zor qoldaý bildirip shyǵaryp salyp, dál sondai kóńilmen kútip aldy. Bul qoldaý biz úshin kúsh berip, jeńiske jetýimizge jiger berdi. Osy sátti paidalana otyryp, qajetti kólikpen qamtamasyz etip, komandaǵa qajet bolǵan barlyq qoldaý sharalaryn kórsetken azamattarǵa óz alǵysymyzdy aitymyz keledi.
Endigi kezekte kelesi jyly elimizde jalaýy jelbireitin Kóshpendilerdiń búkilálemdik oiyndaryna qatysýǵa daiyndyq júrgizetin bolamyz. Bul baǵyttaǵy jumystardy qazirdiń ózinde bastap kettik, – dep, josparymen bólisti.
Ótken marafon-báigeden alǵan áserlerimen komanda jattyqtyrýshysy Nursapa Sabyrjan, komanda kapitany Aidarhan Sháripov pen komandanyń birneshe shabandozdary bólisti.
Kezdesý sońynda komandanyń barlyq músheleri men olardyń jattyqtyrýshylaryna oblys ákiminiń Qurmet gramotasy men Jetisý óńiriniń ǵajap tabiǵaty kórinis tapqan sýretter jáne jalpy komandaǵa 1 mln teńgeniń sertifikaty tabystaldy.
Oblys ákimi atap ótkendei, Jetisý óńiriniń sportyn damytý baǵdarlamasynda ulttyq sport túrlerin, sonyń ishinde at sporty túrlerinen bólek, búrkitshiler men ańshy it tuqymy sanalatyn tazyny kútip baptaýǵa erekshe mán berilgen.
– Ulttyq sport – halqymyzdyń salt-dástúriniń ainymas bólshegi. Ony saqtap, qoldaý kórsetip, odan ári damytý – óte mańyzdy! Bul isti ilgeriletýge tek aǵa býyn ǵana emes, sonymen qatar jastardyń da qyzyǵýshylyǵynyń joǵary ekendigi kóńil qýantady.
Sózimniń jarqyn mysaly men dáleli retinde sizderdiń osy alamanda jetken jarqyn jetistikterińizdi atap kórsetýge bolady. Bizdiń josparda Jetisý oblysy men onyń turǵyndarynyń ár kezeńde qol jetkizgen jetistikterin pash etetin Dańq zalyn ashý jobamyz bar. Sizderdiń qoldaryńyzdaǵy osy bir ádemi kýbokty óńir sportshylarynyń jarqyn jeńisiniń esteligi retinde sol zalǵa qoiamyz, – dedi oblys basshysy Beibit Isabaev.
Esterińizge salar bolsaq, biylǵy 5-19 qyrkúiek aralyǵynda Astana-Túrkistan baǵyty boiynsha 1300 shaqyrym qashyqtyqqa ótken «Uly dala joryǵy» respýblikalyq marafon-báigesine elimizdiń qalalary men oblystarynan 20 komanda, 100 shabandoz qatysqan. 14 kúndik marafon-báigege Jetisý oblysynyń qurama komandasy qatysyp, 1 oryndy ielendi.
