Túrkistan turǵyndaryn balyq ónimderimen tolyq qamtamasyz etý maqsatynda 30 toǵandy balyq sharýashylyǵy, onyń ishinde 4-eýi úiirgelik aýlada ashylǵan.
Bul baǵytta oblys ákimi Darhan Satybaldy balyq sharýashylyǵyn damytý boiynsha jumysty shiratyp, eksporttyq áleýetti kóterýge basymdyq berýdi tapsyrǵan bolatyn.
Osy rette Túrkistan oblysy Jetisai aýdanynda da aýqymdy jumystar atqarylyp keledi. Maqtaly aýyldyq okrýgine qarasty Sholpanqudyq dep atalatyn shaǵyn ǵana aýylda ornalasqan «Dimash» sharýa qojalyǵynyń tóraǵasy Súndet Ablaev jeke qarjysy esebinen 20 mln teńge investitsiia salyp, dóńmańdai, amýr, sazan syndy balyq túrleriniń 1 mln 300 myń dana shabaǵyn alyp kelgen.
Búginde uzyndyǵy 250 metr, eni 180 metrden 3 sý basseininde óndirip, ósiririlip jatqan balyqtardyń ortasha salmaǵy 1,5 keli.
Balyqtarǵa qajetti jemdi Polsha elinen aldyrýda. Shekara asyp keletin jemniń quramynda balyqty túrli aýrý-syrqaýdan saqtaityn jáne ósip-jetilýine qajetti barlyq mineraldar bar ekenin mamandar alǵa tartýda. Sonymen qatar sý basseinderinde úirekterdiń de birneshe túri ósirilýde.
– Memleket basshysy Qasym-Jomart Kemeluly aýyl sharýashylyǵyn damytpai básekege qabiletti ekonomika qurý múmkin emestigin atap ótip, onyń ishinde balyq sharýashylyǵyna da erekshe mán berýdi tapsyrǵan bolatyn. Nátijesinde, memleket tarapynan akvaósirýge paidalanylatyn azyqty satyp alýǵa jumsalatyn shyǵyndardy sýbsidiialaý baǵdarlamasy balyq sharýashylyǵyn damytýǵa ońdy yqpalyn tigizip keledi. Nátijesi de kóńil qýantarlyq, – deidi sharýa qojalyq jumysymen arnaiy kelip tanysqan Jetisai aýdanynyń ákimi Serik Mamytov.
Aita keteiik, memlekettik qoldaýdan qalys qalmaǵan óńirdiń balyq taýaryn óndirýshileri ónimderin Ázerbaijan, Grýziia, Izrail, Resei, Qytai jáne Ózbekstan elderine eksporttap, tabystaryn arttyryp keledi.
