تۇركىستان تۇرعىندارىن بالىق ونىمدەرىمەن تولىق قامتاماسىز ەتۋ ماقساتىندا 30 توعاندى بالىق شارۋاشىلىعى، ونىڭ ىشىندە 4-ەۋى ۇيىرگەلىك اۋلادا اشىلعان.
بۇل باعىتتا وبلىس اكىمى دارحان ساتىبالدى بالىق شارۋاشىلىعىن دامىتۋ بويىنشا جۇمىستى شيراتىپ، ەكسپورتتىق الەۋەتتى كوتەرۋگە باسىمدىق بەرۋدى تاپسىرعان بولاتىن.
وسى رەتتە تۇركىستان وبلىسى جەتىساي اۋدانىندا دا اۋقىمدى جۇمىستار اتقارىلىپ كەلەدى. ماقتالى اۋىلدىق وكرۋگىنە قاراستى شولپانقۇدىق دەپ اتالاتىن شاعىن عانا اۋىلدا ورنالاسقان «ديماش» شارۋا قوجالىعىنىڭ ءتوراعاسى سۇندەت ابلايەۆ جەكە قارجىسى ەسەبىنەن 20 ملن تەڭگە ينۆەستيسيا سالىپ، ءدوڭماڭداي، امۋر، سازان سىندى بالىق تۇرلەرىنىڭ 1 ملن 300 مىڭ دانا شاباعىن الىپ كەلگەن.
بۇگىندە ۇزىندىعى 250 مەتر، ەنى 180 مەتردەن 3 سۋ باسسەينىندە ءوندىرىپ، ءوسىرىرىلىپ جاتقان بالىقتاردىڭ ورتاشا سالماعى 1،5 كەلى.
بالىقتارعا قاجەتتى جەمدى پولشا ەلىنەن الدىرۋدا. شەكارا اسىپ كەلەتىن جەمنىڭ قۇرامىندا بالىقتى ءتۇرلى اۋرۋ-سىرقاۋدان ساقتايتىن جانە وسىپ-جەتىلۋىنە قاجەتتى بارلىق مينەرالدار بار ەكەنىن ماماندار العا تارتۋدا. سونىمەن قاتار سۋ باسسەيندەرىندە ۇيرەكتەردىڭ دە بىرنەشە ءتۇرى وسىرىلۋدە.
– مەملەكەت باسشىسى قاسىم-جومارت كەمەل ۇلى اۋىل شارۋاشىلىعىن دامىتپاي باسەكەگە قابىلەتتى ەكونوميكا قۇرۋ مۇمكىن ەمەستىگىن اتاپ ءوتىپ، ونىڭ ىشىندە بالىق شارۋاشىلىعىنا دا ەرەكشە ءمان بەرۋدى تاپسىرعان بولاتىن. ناتيجەسىندە، مەملەكەت تاراپىنان اكۆاوسىرۋگە پايدالانىلاتىن ازىقتى ساتىپ الۋعا جۇمسالاتىن شىعىنداردى سۋبسيديالاۋ باعدارلاماسى بالىق شارۋاشىلىعىن دامىتۋعا وڭدى ىقپالىن تيگىزىپ كەلەدى. ناتيجەسى دە كوڭىل قۋانتارلىق، – دەيدى شارۋا قوجالىق جۇمىسىمەن ارنايى كەلىپ تانىسقان جەتىساي اۋدانىنىڭ اكىمى سەرىك مامىتوۆ.
ايتا كەتەيىك، مەملەكەتتىك قولداۋدان قالىس قالماعان ءوڭىردىڭ بالىق تاۋارىن وندىرۋشىلەرى ونىمدەرىن ازەربايجان، گرۋزيا، يزرايل، رەسەي، جۇڭگو جانە وزبەكستان ەلدەرىنە ەكسپورتتاپ، تابىستارىن ارتتىرىپ كەلەدى.
