Jetisai jastary balyq aýlap jarysty
Jetisai aýdanynda «Jastar resýrstyq ortalyǵynyń» uiymdastyrýymen áýesqoilar arasynda 2 kúndik balyq aýlaý saiysy óz máresine jetti. Jarysqa Túrkistan oblysynyń túkpir-túkpirinen 30-ǵa jýyq komanda men 100-ge jýyq balyqshy qatysty.
Shardara sý qoimasynyń jaǵalaýynda ótken balyqshylar saiysy óte tartysty ótti. Aýa-raiy qolaily bolǵanymen qarmaqqa balyq az ilindi. Mamandar buǵan kúnniń birden sýyǵany sebep bolǵanyn aitýda. Biraq soǵan qaramastan komandalar 24 saǵat boiy jarystyń kórkin qyzdyrdy. Alǵashqy balyq 20 qazan kúngi túngi saǵat 22:00-der shamasynda qarmaqqa ilindi. Bul joly aýdandyq bilim bóliminiń qyzmetkerlerinen jasaqtalǵan «Batyl» komandasy alǵashqy balyqty ustaǵan bolatyn.
Eki kúndik jarystyń qorytyndysymen birinshi oryndy «Nurly álem» komandasy qanjyǵasyna bailady. Tańǵy 5-ter shamasynda 3 iri balyq ustaǵan komandaǵa balyq aýlaý quraldary men 30 myń teńge tabys etildi. Ekinshi oryndy aýdandyq bilim bóliminiń qyzmetkerlerinen jasaqtalǵan «Batyl» komandasy ielendi. Júldeger komandaǵa 25 myń teńge men aýlaýǵa qajetti qural-saimandar tabystaldy. Al úshinshi oryndy saryaǵashtyq «Altyn balyq» komandasyna buiyrdy. Bul komandaǵa 20 myń teńge men qural-saiman tabys etildi.
Aita keteiik, atalǵan jarysqa «Jańarý» sybailas jemqorlyqqa qarsy jalpyulttyq qozǵalysynyń Jetisai aýdandyq bóliminiń basshysy Alladin Myrzahanov 100 myń teńge kóleminde qarjylai demeýshilik jasady. Tartysty ótken jarys aldaǵy jyldary da óz jalǵasyn tabatyn bolady.
Jetisai aýdany ákiminiń baspasóz qyzmeti
