Jetisai aýdany, J.Eraliev aýyldyq okrýgindegi «Orynbai ata» sharýa qojalyǵy qyryqqabattyń alǵashqy ónimderin kórshiles Resei eline eksporttaýdy bastady, dep habarlaidy Dalanews.kz
Jetisai – negizgi tabysyn aýyl sharýashylyǵy salasy quraityn agrarly aimaq. Erte kóktemnen bastap tynys-tirshiligi qainap jatatyn óńirde sharýalar úshin etken eńbektiń beineti aqtalyp, qyrmannyń berekeli bolýy birinshi orynda.
«Sharýa qojalyǵymyzǵa tiesili 3 gektar jerdiń 1 gektaryna aqpan aiynyń sońynda qyryqqabattyń erte pisetin «Magnýs» sortyn ektik. 45-50 kúnde pisetin «Pekinka» qyryqqabaty búgin alǵashqy ónimin berýde. 1 gektarǵa egilgen 32 myń túp kóshetten óndirilgen ónim oidaǵydai bolyp otyr. Bul ketken shyǵyndarymyz ben tókken terimizdiń tolyqtai aqtalǵanyn bildiredi. Qyryqqabatty Resei federatsiiasynyń Perm qalasyna jóneltip jatyrmyz», - deidi «Orynbai ata» sharýa qojalyǵynyń tóraǵasy Nurlybek Jaiynbaev.
«Magnýstyń» ár kelisin egistik basynan 250 teńgeden saýdalap jatqan sharýa jaqynda 2 gektar egistigine ekken «Zarisma» oramjapyraǵynan da ónim alatynyn aitady. Odan bólek, taǵy 6 gekatarǵa qaýynnyń «Aeroport» sortyn egýge daiyndalyp jatyr.
Jetisai aýdandyq aýyl sharýashylyǵy jáne jer qatynastar bóliminiń málimetinshe, Jetisai aýdanynda biyl 1158 gektar aýmaqqa erte pisetin qyryqqabat egilip, boljam boiynsha 50 myń tonnaǵa jýyq ónim alý josparlanýda.
«Zarisma», «Valikor», «Magnýs», «Rinda», «Zakaz» syndy qyryqqabat sorttary egilgen alqaptyń 893 gektaryna sý únemdeý tehnologiiasy engizilgen.
Byltyr aýdan diqandary 1287 gektar jerge qyryqqabat daqylyn egip, gektarynan orta eseppen 30 tsentnerden ónimin óndirgen. Negizinen erte pisetin qyryqqabattyń basym bóligi Resei, Belorýssiia jáne Eýropa elderine eksporttalady.
