جەتىساي اۋدانى، ج.ەرالييەۆ اۋىلدىق وكرۋگىندەگى «ورىنباي اتا» شارۋا قوجالىعى قىرىققاباتتىڭ العاشقى ونىمدەرىن كورشىلەس رەسەي ەلىنە ەكسپورتتاۋدى باستادى، دەپ حابارلايدى Dalanews.kz
جەتىساي – نەگىزگى تابىسىن اۋىل شارۋاشىلىعى سالاسى قۇرايتىن اگرارلى ايماق. ەرتە كوكتەمنەن باستاپ تىنىس-تىرشىلىگى قايناپ جاتاتىن وڭىردە شارۋالار ءۇشىن ەتكەن ەڭبەكتىڭ بەينەتى اقتالىپ، قىرماننىڭ بەرەكەلى بولۋى ءبىرىنشى ورىندا.
«شارۋا قوجالىعىمىزعا تيەسىلى 3 گەكتار جەردىڭ 1 گەكتارىنا اقپان ايىنىڭ سوڭىندا قىرىققاباتتىڭ ەرتە پىسەتىن «ماگنۋس» سورتىن ەكتىك. 45-50 كۇندە پىسەتىن «پەكينكا» قىرىققاباتى بۇگىن العاشقى ءونىمىن بەرۋدە. 1 گەكتارعا ەگىلگەن 32 مىڭ ءتۇپ كوشەتتەن وندىرىلگەن ءونىم ويداعىداي بولىپ وتىر. بۇل كەتكەن شىعىندارىمىز بەن توككەن تەرىمىزدىڭ تولىقتاي اقتالعانىن بىلدىرەدى. قىرىققاباتتى رەسەي فەدەراسياسىنىڭ پەرم قالاسىنا جونەلتىپ جاتىرمىز»، - دەيدى «ورىنباي اتا» شارۋا قوجالىعىنىڭ ءتوراعاسى نۇرلىبەك جايىنبايەۆ.
«ماگنۋستىڭ» ءار كەلىسىن ەگىستىك باسىنان 250 تەڭگەدەن ساۋدالاپ جاتقان شارۋا جاقىندا 2 گەكتار ەگىستىگىنە ەككەن «زاريسما» ورامجاپىراعىنان دا ءونىم الاتىنىن ايتادى. ودان بولەك، تاعى 6 گەكاتارعا قاۋىننىڭ «اەروپورت» سورتىن ەگۋگە دايىندالىپ جاتىر.
جەتىساي اۋداندىق اۋىل شارۋاشىلىعى جانە جەر قاتىناستار ءبولىمىنىڭ مالىمەتىنشە، جەتىساي اۋدانىندا بيىل 1158 گەكتار اۋماققا ەرتە پىسەتىن قىرىققابات ەگىلىپ، بولجام بويىنشا 50 مىڭ تونناعا جۋىق ءونىم الۋ جوسپارلانۋدا.
«زاريسما»، «ۆاليكور»، «ماگنۋس»، «ريندا»، «زاكاز» سىندى قىرىققابات سورتتارى ەگىلگەن القاپتىڭ 893 گەكتارىنا سۋ ۇنەمدەۋ تەحنولوگياسى ەنگىزىلگەن.
بىلتىر اۋدان ديقاندارى 1287 گەكتار جەرگە قىرىققابات داقىلىن ەگىپ، گەكتارىنان ورتا ەسەپپەن 30 سەنتنەردەن ءونىمىن وندىرگەن. نەگىزىنەن ەرتە پىسەتىن قىرىققاباتتىڭ باسىم بولىگى رەسەي، بەلورۋسسيا جانە ەۋروپا ەلدەرىنە ەكسپورتتالادى.
