Saltanatty jiynǵa Túrkistan oblysy ákiminiń orynbasary Málik Otarbaev, Túrkistan oblystyq mádeniet jáne tilderdi damytý basqarmasynyń basshysy Nurdáýlet Isabek, Jetisai aýdanynyń ákimi Jamantai Beisenbaev jáne atalǵan teatrdyń ardager ártisteri men Qurmanbek Jandarbekovtiń aǵaiyn-týystary qatysty.
Shara barysynda Túrkistan oblysy ákiminiń orynbasary Málik Otarbaev teatr ujymyn ataýly merekemen quttyqtady.
«Teatrdyń tarihynda Qurmanbek Jandarbekovtiń esimi altyn áriptermen jazylady. Alǵashqy kúnderden bastap-aq baǵyt-baǵdar berip, akterlerge ustaz bolǵan, uly akterdiń kórkem murasy bizderge rýhani azyq. Qurmanbek Jandarbekov atyndaǵy Jetisai drama teatrynyń - el rýhaniiatyna sińirip jatqan úlesi orasan. 50 jylda qara shańyraqta túrli qoiylymdar qoiylyp, elge tanymal sahna sańlaqtary osy ordadan túlep ushty. Jetisai teatrynyń tarihy men mádeni murasy aýdannyń, oblystyń ǵana emes, búkil Qazaqstannyń óner shejiresine ainalyp keledi», – dedi olys ákiminiń orynbasary.
Qazaq óneriniń qarashańyraqtarynyń biri – Qurmanbek Jandarbekov atyndaǵy Jetisai drama teatry jarty ǵasyrlyq tarihynda talai belesterdi baǵyndyryp, kóptegen kezeńderdi tarih qoinaýyna qaldyrdy. Bul teatrdyń kieli sahnasynda qazaq teatr óneriniń órkendeýine úles qosqan talai sahna maitalmandary eńbek etti. Búginde teatr ujymy sol kezeńderdegi abyzdardyń izin jalǵap, teatr ónerine adal qyzmet etip keledi.
Teatr ujymy 50 jyldyq tarihynda elimizdiń túkpir-túkpirinde óner kórsetip, alys-jaqyn shetelderde ótken festivalderde júldeli oryndarǵa ie bolǵan.
Jetisai aýdany ákiminiń baspasóz qyzmeti
