سالتاناتتى جيىنعا تۇركىستان وبلىسى اكىمىنىڭ ورىنباسارى مالىك وتاربايەۆ، تۇركىستان وبلىستىق مادەنيەت جانە تىلدەردى دامىتۋ باسقارماسىنىڭ باسشىسى نۇرداۋلەت يسابەك، جەتىساي اۋدانىنىڭ اكىمى جامانتاي بەيسەنبايەۆ جانە اتالعان تەاتردىڭ ارداگەر ارتىستەرى مەن قۇرمانبەك جانداربەكوۆتىڭ اعايىن-تۋىستارى قاتىستى.
شارا بارىسىندا تۇركىستان وبلىسى اكىمىنىڭ ورىنباسارى مالىك وتاربايەۆ تەاتر ۇجىمىن اتاۋلى مەرەكەمەن قۇتتىقتادى.
«تەاتردىڭ تاريحىندا قۇرمانبەك جانداربەكوۆتىڭ ەسىمى التىن ارىپتەرمەن جازىلادى. العاشقى كۇندەردەن باستاپ-اق باعىت-باعدار بەرىپ، اكتەرلەرگە ۇستاز بولعان، ۇلى اكتەردىڭ كوركەم مۇراسى بىزدەرگە رۋحاني ازىق. قۇرمانبەك جانداربەكوۆ اتىنداعى جەتىساي دراما تەاترىنىڭ - ەل رۋحانياتىنا ءسىڭىرىپ جاتقان ۇلەسى وراسان. 50 جىلدا قارا شاڭىراقتا ءتۇرلى قويىلىمدار قويىلىپ، ەلگە تانىمال ساحنا ساڭلاقتارى وسى وردادان تۇلەپ ۇشتى. جەتىساي تەاترىنىڭ تاريحى مەن مادەني مۇراسى اۋداننىڭ، وبلىستىڭ عانا ەمەس، بۇكىل قازاقستاننىڭ ونەر شەجىرەسىنە اينالىپ كەلەدى»، – دەدى ولىس اكىمىنىڭ ورىنباسارى.
قازاق ونەرىنىڭ قاراشاڭىراقتارىنىڭ ءبىرى – قۇرمانبەك جانداربەكوۆ اتىنداعى جەتىساي دراما تەاترى جارتى عاسىرلىق تاريحىندا تالاي بەلەستەردى باعىندىرىپ، كوپتەگەن كەزەڭدەردى تاريح قويناۋىنا قالدىردى. بۇل تەاتردىڭ كيەلى ساحناسىندا قازاق تەاتر ونەرىنىڭ وركەندەۋىنە ۇلەس قوسقان تالاي ساحنا مايتالماندارى ەڭبەك ەتتى. بۇگىندە تەاتر ۇجىمى سول كەزەڭدەردەگى ابىزداردىڭ ءىزىن جالعاپ، تەاتر ونەرىنە ادال قىزمەت ەتىپ كەلەدى.
تەاتر ۇجىمى 50 جىلدىق تاريحىندا ەلىمىزدىڭ تۇكپىر-تۇكپىرىندە ونەر كورسەتىپ، الىس-جاقىن شەتەلدەردە وتكەن فەستيۆالدەردە جۇلدەلى ورىندارعا يە بولعان.
جەتىساي اۋدانى اكىمىنىڭ باسپا ءسوز قىزمەتى
