Tanymal qoǵam belsendisi, "Atameken" kásipkerler palatasy tóraǵasynyń keńesshisi Almas Erjan búginderi álemniń "qyzyl núktesi" - áskeri urys qimyldar júrip jatqan aimaqtardan bas saýǵalai qashqan bosqyndardy qabyldap, Qazaqstannan baspana berýdi usynady, dep habarlaidy Dalanews.kz.
"Nege Qazaqstanǵa Iran, Gaza sektory, tipti Izrailden bas saýǵalai qashyp, pana izdegen jandardy qabyldamasqa? Kóbine, nasihat ideologiiasynda "Qazaqstan - kez kelgen din, kez kelgen kózqarastaǵy barlyq adamnyń kieli mekeni, altyn besigi" dep sipattalyp jatady emes pe? Olardan kelgen kásipkerler, ǵalymdar, dárigerler, pedagogtar jáne ózge de ilim men bilimge bai mamandarǵa bizden jumys ta tabylar edi. Balalary da el qatarly oqyp, otbasylary da qaýipsiz jerde ómir súrýge múmkindik alar edi. Menińshe, Qazaqstan 50 mln adamǵa deiin qabyldaýǵa qaýqarly. Jer de, jumys ta bárine jetedi, tarlanyp qaitemiz, keń qazaq emespiz be" dep meńzei jazypty Almaz Erjan Facebook-tegi paraqshasynda.
Onyń ortaǵa salǵan bul oiy jelidegilerdiń qyzý talqysyna túsip jatqan jaiy bar.
Aita ketsek, Izrail áskeri-áýe kúshteri 13 maýsymǵa qaraǵan túni Irandaǵy áskeri jáne ónerkásiptik nysandarǵa soqqy berip, Tegerannyń iadrolyq baǵdarlamasyna qarsy operatsiiany júzege asyrdy. Tel-Aviv tótenshe jaǵdai rejimin engizdi, óitkeni olar jaýapty soqqyǵa daiyndalýda. Irannyń rýhani kóshbasshysy Aiatolla Áli Hamenei Izraildiń Islam respýblikasyna jasaǵan áýe shabýylyn qatty synǵa alyp, jaýaptyń qatań bolatynyn eskertti. Izraildiń Iranǵa shabýyly aiasynda Brent munaiynyń bir barreli 78,5 dollarǵa deiin qymbattap, qazir baǵa sál-pál tústi.
