تانىمال قوعام بەلسەندىسى، "اتامەكەن" كاسىپكەرلەر پالاتاسى ءتوراعاسىنىڭ كەڭەسشىسى الماس ەرجان بۇگىندەرى الەمنىڭ "قىزىل نۇكتەسى" - اسكەري ۇرىس قيمىلدار ءجۇرىپ جاتقان ايماقتاردان باس ساۋعالاي قاشقان بوسقىنداردى قابىلداپ، قازاقستاننان باسپانا بەرۋدى ۇسىنادى، دەپ حابارلايدى Dalanews.kz.
"نەگە قازاقستانعا يران، گازا سەكتورى، ءتىپتى يزرايلدەن باس ساۋعالاي قاشىپ، پانا ىزدەگەن جانداردى قابىلداماسقا؟ كوبىنە، ناسيحات يدەولوگياسىندا "قازاقستان - كەز كەلگەن ءدىن، كەز كەلگەن كوزقاراستاعى بارلىق ادامنىڭ كيەلى مەكەنى، التىن بەسىگى" دەپ سيپاتتالىپ جاتادى ەمەس پە؟ ولاردان كەلگەن كاسىپكەرلەر، عالىمدار، دارىگەرلەر، پەداگوگتار جانە وزگە دە ءىلىم مەن بىلىمگە باي ماماندارعا بىزدەن جۇمىس تا تابىلار ەدى. بالالارى دا ەل قاتارلى وقىپ، وتباسىلارى دا ءقاۋىپسىز جەردە ءومىر سۇرۋگە مۇمكىندىك الار ەدى. مەنىڭشە، قازاقستان 50 ملن ادامعا دەيىن قابىلداۋعا قاۋقارلى. جەر دە، جۇمىس تا بارىنە جەتەدى، تارلانىپ قايتەمىز، كەڭ قازاق ەمەسپىز بە" دەپ مەڭزەي جازىپتى الماز ەرجان Facebook-تەگى پاراقشاسىندا.
ونىڭ ورتاعا سالعان بۇل ويى جەلىدەگىلەردىڭ قىزۋ تالقىسىنا ءتۇسىپ جاتقان جايى بار.
ايتا كەتسەك، يزرايل اسكەري-اۋە كۇشتەرى 13 ماۋسىمعا قاراعان ءتۇنى يرانداعى اسكەري جانە ونەركاسىپتىك نىساندارعا سوققى بەرىپ، تەگەراننىڭ يادرولىق باعدارلاماسىنا قارسى وپەراسيانى جۇزەگە اسىردى. تەل-اۆيۆ توتەنشە جاعداي رەجيمىن ەنگىزدى، ويتكەنى ولار جاۋاپتى سوققىعا دايىندالۋدا. يراننىڭ رۋحاني كوشباسشىسى اياتوللا ءالي حامەنەي ءيزرايلدىڭ يسلام رەسپۋبليكاسىنا جاساعان اۋە شابۋىلىن قاتتى سىنعا الىپ، جاۋاپتىڭ قاتاڭ بولاتىنىن ەسكەرتتى. ءيزرايلدىڭ يرانعا شابۋىلى اياسىندا Brent مۇنايىنىڭ ءبىر باررەلى 78،5 دوللارعا دەيىن قىمباتتاپ، ءقازىر باعا ءسال-پال ءتۇستى.
