Parlament minberinde óziniń saiasi baǵdarlamasyn jariia etken saiasatker Kýril araldaryna qatysty jer daýyn sheshýge basymdyq beretinin atap ótti.
"Soltústik territoriialar tóńiregindegi máselelerdiń basyn ashyp alǵanymyz jón, tek sodan keiin ǵana Reseimen beibit kelisimge qol qoiýdy talqylaityn bolamyz", – dedi ol.
Kisida territoriiaǵa qatysty Japoniia talaby tolyq oryndalmaiynsha Reseimen arada bitim ornamasyn kesip aitty.
7 qazanda Resei prezidenti Vladimir Pýtinmen telefon arqyly tildesken Kisida Kýril araldaryna qatysty óz kózqarasyn ortaǵa salǵan.
Kisida Ońtústik Kýrilde ornalasqan - Kýnashir, Shikotan, Habomai jáne Itýrýp araldaryn Japoniiaǵa qaitarýdy talap etken.
"Tórt aral da bizdiń elge tiesili. Biz bul pozitsiiamyzdan taimaimyz. Reseimen aradaǵy kelissóz tek osy baǵytta órbidi", – dep atap ótken eken japon saiasatkeri.
Aita ketelik 1855 jylǵy ekijaqty Saýda-sattyq jáne shekara traktatynyń talabyna sai Japoniia - Kýnashir, Shikotan, Habomai jáne Itýrýp araldaryna ielik etýge quqyly.
Ekinshi dúniejúzilik soǵystan keiin KSRO-men bitimge kelgen Tokio, beibit kelisimniń óteýi retinde – araldardy Japoniia quramyna qaitarýǵa qatysty shart qoiǵan, alaida talap áli kúnge deiin oryndalǵan joq.
1956 jyly KSRO jáne Japoniia diplomattary qaitadan ústel basyna jinalady. Kelissóz nátijesinde Máskeý Tokioǵa tórt araldyń tek ekeýin qaitaryp berýge kónedi. Alaida Japoniia taraby bul usynysty qabyl almaidy. Sebebi KSRO biligi alǵashqydaǵy sertinen taiqyp ketken edi.
Pýtindik Reseidiń qazirgi ýáji: "Ekinshi dúniejúzilik soǵystan keiin atalǵan araldar KSRO quramyna ótti, olardyń Reseige tiesili eken daý týǵyzbaidy" degenge saiady.
Kreml mańyndaǵy sarapshylardyń tuspaldaýynsha aral taǵdyryna qatysty Japoniia premerimen ótetin mańyzdy talqylaýda Pýtin osy ustanymda turýy tiis.
