«Jer reformasy jónindegi úkimettik komissiiasynyń árbir jinalysynda Muhtar Shahanov, Dos Kóshim, Aidos Sarym, Muhtar Taijan, Januzaq Ákim taǵy basqa beldi de bedeldi azamattar aitýdai-aq aitty, jazdy, talap etti. Sol úshin de úlken rizashylyǵymdy bildiremin», - dep jazady Maqsat Iliiasuly óziniń Feisbýk jelisindegi paraqshasynda.
Onyń oiynsha Jer komissiiasy halyq kútkendei nátije kórsete almaǵan.
«Alaida, zor ókinishke qarai jer komissiiasynyń jumysy kópshiliktiń kóńilinen shyqqan joq. Ol ras. Onyń basty jáne negizgi sebebi biliktiń jerdi satý nietinen bas tartpaýynda jatsa kerek. Keibir azamattar meni komissiiadan shyǵyp ketkenim úshin kinálap jatyr. Iia, Muhtar Taijan, Muhtar Shahanov, Dos Kóshim basqa da azamattar komissiiada qalýdy tańdady, ol úshin olarǵa esh renjýdiń qajeti joq. Tańdaý jasaýǵa árkim erikti. Al biz, Maks Bokaev, Záýresh Battalova, Men mitingini tańdadyq. Eger biz komissiia quramynda otyra bersek mitinginiń ótýine kedergi jasaityn boldyq. Dál 21 mamyr kúni komissiianyń kezekti jinalysy boldy. Soǵan orai biz óz tańdaýymyzdy jasadyq jáne oǵan esh ókingen joqpyz», - deidi M. Iliiasuly.
«Endi mine sol mitingiden de, komissiiadan da elge, jerge paida azdaý bolyp turǵan siiaqty. Sebebi, basty maqsatymyzǵa, iaǵni jerdi eshkimge satqyzbaýǵa, sheteldikterge jalǵa da bergizbeýge qol jetkize almaityn siiaqtymyz. Sebebi, osy aptanyń senbisinde jer komissiiasynyń sońǵy jinalysy ótedi degen de sybys bar. Al, negizgi másele, jerdi eshkimge satqyzbaýdy, sheteldikterge jalǵa da bergizbeýdi qamtamasyz etetin zań jobasy jasalǵan joq, jer ieleriniń aty-jóni jariialanǵan joq, jerdiń qanshasy jeke menshikte, qanshasy satylǵan, olardyń bári kimderdiń qolynda, bári-bári belgisiz sol baiaǵy qalpynda qalyp barady», - degen ol aldaǵy ýaqytta da komissiia jumysynyń qandai nátije kórsetetinine qaramastan belsendilerdiń birlikte bolýy kerek dep sanaidy.
«Sondyqtan, komissiia jumysyn toqtatqannan keiin de halyq qalaǵan, talap etken zań qabyldanyp, jer daýy sheshilmese, ne bolsa da, qandai jaǵdai bolsa da birge bolaiyq. Jerdi qorǵap qalýdyń, saqtap qalýdyń jańa joldaryn birge qarastyraiyq. Bálkim ol miting bolar, bálkim basqasha bolar, biraq qaitken kúnde de jerdi saqtaý úshin birigýimiz kerek. Meniń jazǵan pikirlerim, oilarym Muhtar Taijannyń jeke basyna qatysty emes. Onyń jeke basyn, azamattyǵyn zor qurmetteimin, syilaimyn. Ári qurdas, áli dos Muhtarǵa aitpaǵanda kimge aitylady syn pikirler. Al jurtshylyq ony jer janashyrlarynyń ózara pikir alysýy, aqyldasýy, tipti sher tarqatýy dep túsinsin degim keledi», - dep jazady M. Iliiasuly.
Derekkóz: «Qamshy»
