«جەر رەفورماسى جونىندەگى ۇكىمەتتىك كوميسسياسىنىڭ ءاربىر جينالىسىندا مۇحتار شاحانوۆ، دوس كوشىم، ايدوس سارىم، مۇحتار تايجان، جانۇزاق اكىم تاعى باسقا بەلدى دە بەدەلدى ازاماتتار ايتۋداي-اق ايتتى، جازدى، تالاپ ەتتى. سول ءۇشىن دە ۇلكەن ريزاشىلىعىمدى بىلدىرەمىن»، - دەپ جازادى ماقسات ءىلياس ۇلى ءوزىنىڭ فەيسبۋك جەلىسىندەگى پاراقشاسىندا.
ونىڭ ويىنشا جەر كوميسسياسى حالىق كۇتكەندەي ناتيجە كورسەتە الماعان.
«الايدا، زور وكىنىشكە قاراي جەر كوميسسياسىنىڭ جۇمىسى كوپشىلىكتىڭ كوڭىلىنەن شىققان جوق. ول راس. ونىڭ باستى جانە نەگىزگى سەبەبى بيلىكتىڭ جەردى ساتۋ نيەتىنەن باس تارتپاۋىندا جاتسا كەرەك. كەيبىر ازاماتتار مەنى كوميسسيادان شىعىپ كەتكەنىم ءۇشىن كىنالاپ جاتىر. يا، مۇحتار تايجان، مۇحتار شاحانوۆ، دوس كوشىم باسقا دا ازاماتتار كوميسسيادا قالۋدى تاڭدادى، ول ءۇشىن ولارعا ەش رەنجۋدىڭ قاجەتى جوق. تاڭداۋ جاساۋعا اركىم ەرىكتى. ال ءبىز، ماكس بوكايەۆ، زاۋرەش باتتالوۆا، مەن ميتينگىنى تاڭدادىق. ەگەر ءبىز كوميسسيا قۇرامىندا وتىرا بەرسەك ميتينگىنىڭ وتۋىنە كەدەرگى جاسايتىن بولدىق. ءدال 21 مامىر كۇنى كوميسسيانىڭ كەزەكتى جينالىسى بولدى. سوعان وراي ءبىز ءوز تاڭداۋىمىزدى جاسادىق جانە وعان ەش وكىنگەن جوقپىز»، - دەيدى م. ءىلياس ۇلى.
«ەندى مىنە سول ميتينگىدەن دە، كوميسسيادان دا ەلگە، جەرگە پايدا ازداۋ بولىپ تۇرعان سياقتى. سەبەبى، باستى ماقساتىمىزعا، ياعني جەردى ەشكىمگە ساتقىزباۋعا، شەتەلدىكتەرگە جالعا دا بەرگىزبەۋگە قول جەتكىزە المايتىن سياقتىمىز. سەبەبى، وسى اپتانىڭ سەنبىسىندە جەر كوميسسياسىنىڭ سوڭعى جينالىسى وتەدى دەگەن دە سىبىس بار. ال، نەگىزگى ماسەلە، جەردى ەشكىمگە ساتقىزباۋدى، شەتەلدىكتەرگە جالعا دا بەرگىزبەۋدى قامتاماسىز ەتەتىن زاڭ جوباسى جاسالعان جوق، جەر يەلەرىنىڭ ءاتى-جونى جاريالانعان جوق، جەردىڭ قانشاسى جەكە مەنشىكتە، قانشاسى ساتىلعان، ولاردىڭ ءبارى كىمدەردىڭ قولىندا، ءبارى-بارى بەلگىسىز سول باياعى قالپىندا قالىپ بارادى»، - دەگەن ول الداعى ۋاقىتتا دا كوميسسيا جۇمىسىنىڭ قانداي ناتيجە كورسەتەتىنىنە قاراماستان بەلسەندىلەردىڭ بىرلىكتە بولۋى كەرەك دەپ سانايدى.
«سوندىقتان، كوميسسيا جۇمىسىن توقتاتقاننان كەيىن دە حالىق قالاعان، تالاپ ەتكەن زاڭ قابىلدانىپ، جەر داۋى شەشىلمەسە، نە بولسا دا، قانداي جاعداي بولسا دا بىرگە بولايىق. جەردى قورعاپ قالۋدىڭ، ساقتاپ قالۋدىڭ جاڭا جولدارىن بىرگە قاراستىرايىق. بالكىم ول ميتينگ بولار، بالكىم باسقاشا بولار، ءبىراق قايتكەن كۇندە دە جەردى ساقتاۋ ءۇشىن بىرىگۋىمىز كەرەك. مەنىڭ جازعان پىكىرلەرىم، ويلارىم مۇحتار تايجاننىڭ جەكە باسىنا قاتىستى ەمەس. ونىڭ جەكە باسىن، ازاماتتىعىن زور قۇرمەتتەيمىن، سىيلايمىن. ءارى قۇرداس، ءالى دوس مۇحتارعا ايتپاعاندا كىمگە ايتىلادى سىن پىكىرلەر. ال جۇرتشىلىق ونى جەر جاناشىرلارىنىڭ ءوزارا پىكىر الىسۋى، اقىلداسۋى، ءتىپتى شەر تارقاتۋى دەپ ءتۇسىنسىن دەگىم كەلەدى»، - دەپ جازادى م. ءىلياس ۇلى.
دەرەككوز: «قامشى»
