Pavlodarda Jeńis kúni qarsańynda oryn alǵan bul oqiǵa kópshiliktiń narazylyǵyn týdyrdy. Tórt jasóspirim qyz Otan úshin janyn qiǵan bozdaqtarǵa arnalǵan Dańq eskertkishi men Máńgilik alaý janynda ashyq qimyl-qozǵalystarmen bi bilep, ony beinejazbaǵa túsirip, áleýmettik jelige júktegen, dep habarlaidy Dalanews.kz.
Sot bul áreketti qoǵamǵa qarsy jáne ádepke jat qylyq dep tanyp, "usaq buzaqylyq" retinde baǵalady.
Jasóspirimderdiń tárbiesi úshin jaýapty retinde, ár qyzdyń ata-anasyna bala tárbieleý jónindegi mindetin oryndamaǵany úshin 55 048 teńge kóleminde aiyppul salyndy.
Qatysýshylardyń ishinde jasy 16-ǵa tolǵan eki qyz ákimshilik jaýapkershilikke tartyldy. Alaida, sot olardyń naqty qandai jazaǵa kesilgenin habarlamady.
Al 16 jasqa tolmaǵan eki qyzdyń ata-anasyna, joǵarydaǵy aiyppuldan bólek, árqaisysyna 19 267 teńgeden taǵy aiyppul salyndy.
Aita keteiik, buǵan deiin Pavlodarda Jeńis saiabaǵynda ádepsiz bi bilegenderge sot sheshimi shyqqanyn jazǵan edik.
Pavlodar qalasynyń ákimshilik quqyqbuzýshylyqtar jónindegi mamandandyrylǵan aýdanaralyq soty 2008 jylǵy J. men 2009 jylǵy I.-ge qatysty ákimshilik quqyqbuzýshylyq týraly isti qarady.
"2025 jylǵy 2 mamyrda saǵat 16:00 shamasynda kámeletke tolmaǵan J. men I. Pavlodar qalasyndaǵy Dańq alańyna baryp, Dańq Obeliski men Máńgilik alaýdyń janynda uiatsyz bilermen beinerolik túsirip, osylaisha Qazaqstan Respýblikasy ákimshilik quqyqbuzýshylyq týraly kodeksi 434-babynyń 4-bóliginde kózdelgen usaq buzaqylyqty jasaǵan", - dep jazylǵan sot habarlamasynda.
Sot otyrysy barysynda eki qyz kinásin tolyq moiyndaǵan.
J. saiabaqqa horeograftyń shaqyrýymen ári basqa qyzdarmen birge Jeńis kúnine arnalǵan beinerolik túsirý úshin kelgenin aitty. Onyń sózinshe, TikTok jelisinen kórgen trendten keiin osyndai bi túsirý ideiasy kelgen. Túsirilgen beinerolik Instagram jelisindegi jabyq paraqshaǵa "Saiabaqty qorlaimyz" degen orynsyz jazýmen jariialanǵan. I. da osyǵan uqsas túsinikteme bergen.
