Astana qalasynyń ákimdigi investitsiia tartý jáne ekonomikalyq damýdy jedeldetý maqsatynda Óńirlik investitsiialyq shtab quryp, onyń jumysy arqyly qalaǵa otandyq jáne sheteldik investitsiialardy belsendi túrde tartýda, – dep habarlaidy Dalanews.kz Astana qalasy ákiminiń baspasóz qyzmetine silteme jasap.
Taiaýda qala basshysy Jeńis Qasymbektiń qatysýymen Óńirlik investitsiialyq shtabtyń kezekti basqosýy ótti. Shtabtyń negizgi maqsaty – investitsiialyq jobalardy tiimdi júzege asyrý úshin qajetti jaǵdailar jasaý, investorlarǵa qoldaý kórsetý jáne olardyń máselelerin jedel sheshý. Otyrys barysynda jańa investitsiialyq jobalar úshin jer ýchaskelerin izdeý, tehnikalyq sharttardy berý, naqty josparlaýdy túzetý jáne ázirleý, sondai-aq shuǵyl sheshimdi talap etetin ózge de ózekti máseleler talqylanady.
– Búgin investitsiialyq shtab otyrysynda investorlardyń usynystaryn qaradyq. Máselen, olar – 1700 orynǵa arnalǵan eki mekteptiń qurylysy, diagnostikalyq ortalyq, tseh jáne óndiristik qoima, 15 myń pallet ornyna eseptelgen tońazytqysh qoimasy, tústi metaldar qorytpalary men qyshqyl akkýmýliatorlar shyǵaratyn zaýyt. Sol siiaqty jabyq turaq salý máselesin qarastyrdyq, – dedi Jeńis Qasymbek.
Ákim bul jobalardyń qalanyń damýyna jeke qarajat tartyp qana qoimai, turaqty jumys oryndaryn ashýǵa múmkindik beretinin aitty.
– Óńirlik investitsiialyq shtab otyrystaryn turaqty negizde ótkizip turamyz. Onda árbir jobany jeke qarastyryp, investorlarǵa jan-jaqty qoldaý kórsetemiz. Birinshi kezekte turǵyndar men qalamyzǵa qajetti jobalardy qoldaimyz, – dedi qala ákimi.
Shtabtyń jumysy nátijesinde Astanada birqatar mańyzdy investitsiialyq jobalar iske asyrylýda. Mysaly, 2023 jyly qalada 1,1 trln teńgege 160 joba júzege asyrylǵanyn atap aitýǵa bolady. Onyń ishinde 20-sy sheteldik investitsiialardy tartý arqyly iske qosyldy. Bul jobalar 10 myńnan astam jańa jumys ornyn ashýǵa múmkindik berdi.
Búginde Astana qalasy ákimdigi investorlarǵa qolaily jaǵdai jasaý maqsatynda «bir tereze» qaǵidaty boiynsha qyzmet kórsetý júiesi engizgen bolatyn. Bul júie arqyly investorlar qajetti qujattardy rásimdeý, ruqsattar alý jáne basqa da ákimshilik máselelerdi sheshýde ýaqyt pen resýrstaryn únemdeidi.
Astana qalasynyń ákimdigi investitsiialyq shtabtyń jumysyn odan ári jetildirip, jańa jobalardy tartý jáne iske asyrý boiynsha belsendi jumystar júrgizýdi josparlap otyr. Bul qala ekonomikasynyń turaqty damýyn qamtamasyz etip, turǵyndardyń ál-aýqatyn arttyrýǵa septigin tigizetini anyq. Óńirlik investitsiialyq shtabtyń tiimdi qyzmeti nátijesinde Astana qalasy investitsiialyq tartymdylyǵyn arttyryp, otandyq jáne sheteldik investorlar úshin senimdi áripteske ainalýda.
