استانا قالاسىنىڭ اكىمدىگى ينۆەستيسيا تارتۋ جانە ەكونوميكالىق دامۋدى جەدەلدەتۋ ماقساتىندا وڭىرلىك ينۆەستيسيالىق شتاب قۇرىپ، ونىڭ جۇمىسى ارقىلى قالاعا وتاندىق جانە شەتەلدىك ينۆەستيسيالاردى بەلسەندى تۇردە تارتۋدا، – دەپ حابارلايدى Dalanews.kz استانا قالاسى اكىمىنىڭ باسپا ءسوز قىزمەتىنە سىلتەمە جاساپ.
تاياۋدا قالا باسشىسى جەڭىس قاسىمبەكتىڭ قاتىسۋىمەن وڭىرلىك ينۆەستيسيالىق شتابتىڭ كەزەكتى باسقوسۋى ءوتتى. شتابتىڭ نەگىزگى ماقساتى – ينۆەستيسيالىق جوبالاردى ءتيىمدى جۇزەگە اسىرۋ ءۇشىن قاجەتتى جاعدايلار جاساۋ، ينۆەستورلارعا قولداۋ كورسەتۋ جانە ولاردىڭ ماسەلەلەرىن جەدەل شەشۋ. وتىرىس بارىسىندا جاڭا ينۆەستيسيالىق جوبالار ءۇشىن جەر ۋچاسكەلەرىن ىزدەۋ، تەحنيكالىق شارتتاردى بەرۋ، ناقتى جوسپارلاۋدى تۇزەتۋ جانە ازىرلەۋ، سونداي-اق شۇعىل شەشىمدى تالاپ ەتەتىن وزگە دە وزەكتى ماسەلەلەر تالقىلانادى.
– بۇگىن ينۆەستيسيالىق شتاب وتىرىسىندا ينۆەستورلاردىڭ ۇسىنىستارىن قارادىق. ماسەلەن، ولار – 1700 ورىنعا ارنالعان ەكى مەكتەپتىڭ قۇرىلىسى، دياگنوستيكالىق ورتالىق، سەح جانە وندىرىستىك قويما، 15 مىڭ پاللەت ورنىنا ەسەپتەلگەن توڭازىتقىش قويماسى، ءتۇستى مەتالدار قورىتپالارى مەن قىشقىل اككۋمۋلياتورلار شىعاراتىن زاۋىت. سول سياقتى جابىق تۇراق سالۋ ماسەلەسىن قاراستىردىق، – دەدى جەڭىس قاسىمبەك.
اكىم بۇل جوبالاردىڭ قالانىڭ دامۋىنا جەكە قاراجات تارتىپ قانا قويماي، تۇراقتى جۇمىس ورىندارىن اشۋعا مۇمكىندىك بەرەتىنىن ايتتى.
– وڭىرلىك ينۆەستيسيالىق شتاب وتىرىستارىن تۇراقتى نەگىزدە وتكىزىپ تۇرامىز. وندا ءاربىر جوبانى جەكە قاراستىرىپ، ينۆەستورلارعا جان-جاقتى قولداۋ كورسەتەمىز. ءبىرىنشى كەزەكتە تۇرعىندار مەن قالامىزعا قاجەتتى جوبالاردى قولدايمىز، – دەدى قالا اكىمى.
شتابتىڭ جۇمىسى ناتيجەسىندە استانادا ءبىرقاتار ماڭىزدى ينۆەستيسيالىق جوبالار ىسكە اسىرىلۋدا. مىسالى، 2023 جىلى قالادا 1،1 ترلن تەڭگەگە 160 جوبا جۇزەگە اسىرىلعانىن اتاپ ايتۋعا بولادى. ونىڭ ىشىندە 20-سى شەتەلدىك ينۆەستيسيالاردى تارتۋ ارقىلى ىسكە قوسىلدى. بۇل جوبالار 10 مىڭنان استام جاڭا جۇمىس ورنىن اشۋعا مۇمكىندىك بەردى.
بۇگىندە استانا قالاسى اكىمدىگى ينۆەستورلارعا قولايلى جاعداي جاساۋ ماقساتىندا «ءبىر تەرەزە» قاعيداتى بويىنشا قىزمەت كورسەتۋ جۇيەسى ەنگىزگەن بولاتىن. بۇل جۇيە ارقىلى ينۆەستورلار قاجەتتى قۇجاتتاردى راسىمدەۋ، رۇقساتتار الۋ جانە باسقا دا اكىمشىلىك ماسەلەلەردى شەشۋدە ۋاقىت پەن رەسۋرستارىن ۇنەمدەيدى.
استانا قالاسىنىڭ اكىمدىگى ينۆەستيسيالىق شتابتىڭ جۇمىسىن ودان ءارى جەتىلدىرىپ، جاڭا جوبالاردى تارتۋ جانە ىسكە اسىرۋ بويىنشا بەلسەندى جۇمىستار جۇرگىزۋدى جوسپارلاپ وتىر. بۇل قالا ەكونوميكاسىنىڭ تۇراقتى دامۋىن قامتاماسىز ەتىپ، تۇرعىنداردىڭ ءال-اۋقاتىن ارتتىرۋعا سەپتىگىن تيگىزەتىنى انىق. وڭىرلىك ينۆەستيسيالىق شتابتىڭ ءتيىمدى قىزمەتى ناتيجەسىندە استانا قالاسى ينۆەستيسيالىق تارتىمدىلىعىن ارتتىرىپ، وتاندىق جانە شەتەلدىك ينۆەستورلار ءۇشىن سەنىمدى ارىپتەسكە اينالۋدا.
