"Jelidegi jazbany bólisken" belsendige 200 myń teńge aiyppul salyndy
Ainagúl Tóbetovanyń sózinshe, 1 qarasha kúni ýchaskelik inspektor belsendini politsiia bólimshesine áketip, qujat toltyrǵan. Ertesinde 2 qarasha kúni onlain sot ótedi. Tóbetova QR Ákimshilik quqyq buzýshylyq týraly kodeksindegi 488-baptyń 12-bóligimen ("beibit jinalystardy uiymdastyrý jáne ótkizý tártibi týraly" QR zańnamasyn buzý) aiyptalǵan.
- Bul biyldyqqa maǵan salynyp otyrǵan ekinshi aiyppul. Osyǵan deiin shilde aiynda WhatsApp chatta belsendilerdi mitingige shaqyrǵanym úshin 50 AEK-ke (ailyq eseptik kórsetkish) teń aiyppul salyndy. Ózimdi kináli sanamaimyn. Sondyqtan bul aiyppuldardy tóleitin nietim joq. Sottyń aldyńǵy qaýlysyna da apelliatsiialyq shaǵym jazǵanmyn. Oblystyq alqa shaǵymymdy qanaǵattandyrmady. Qazir ol shaǵym Joǵarǵy sotta. Ekinshi qarasha kúngi qaýlymen de kelispeimin, - deidi Ainagúl Tóbetova.
Tóbetova 15 qazan kúni jelidegi jeke paraqshasynda jalaqyny, zeinetaqyny, járdemaqyny kóterip, saiasi tutqyndardy bosatýdy talap etetin mitingige shaqyrǵan jazbany bólisken. Ony ózi de rastap otyr. Aitýynsha, ol beibit miting ótkizetinin habarlap, qala ákimdigine birneshe márte habarlasqan. Qala ákimdigi Tóbetovaǵa ruqsat bermegen.
"Sot qaýlysymen A.Tóbetova ÁQBtK-niń 488-babynyń 12-bóligi boiynsha ákimshilik quqyqbuzýshylyq jasaǵany úshin kináli de tanyldy jáne oǵan qatysty 204 190 teńge somasynda aiyppul túrindegi jazalaý sharasy qoldanyldy" dep jazylǵan Aqtóbe oblystyq sotynyń habarlamasynda.
Sot qaýlysy 2 qarasha kúni shyqqan. Áli zańdy kúshine engen joq.
Qazaqstanda byltyr "Beibit jiyn týraly" jańa zań qabyldanǵanmen quqyq qorǵaýshylar azamattardyń beibit jiyn ótkizý jáne jinalý quqyǵy áli shektelip otyrǵanyn synaidy. Kóp jaǵdaida azamattardyń beibit sherý ótkizý týraly ótinishteri oryndalmaidy. Bilik kóbine sol kúni ózge shara ótetinin nemese ótinishtiń qajetti erejelerdi saqtai otyryp jazylmaǵanyn nemese karantin shekteýlerdi alǵa tartady. Al "ruqsat etilmegen" sharaǵa kelgender ádette ustalyp, ákimshilik jaýapqa tartylady. Halyqaralyq quqyq qorǵaý uiymdary Nur-Sultandy atalǵan shekteýlerdi alyp tastaýǵa shaqyrǵan.
