ايناگۇل توبەتوۆانىڭ سوزىنشە، 1 قاراشا كۇنى ۋچاسكەلىك ينسپەكتور بەلسەندىنى پوليسيا بولىمشەسىنە اكەتىپ، قۇجات تولتىرعان. ەرتەسىندە 2 قاراشا كۇنى ونلاين سوت وتەدى. توبەتوۆا ق ر اكىمشىلىك قۇقىق بۇزۋشىلىق تۋرالى كودەكسىندەگى 488-باپتىڭ 12-بولىگىمەن ("بەيبىت جينالىستاردى ۇيىمداستىرۋ جانە وتكىزۋ ءتارتىبى تۋرالى" ق ر زاڭناماسىن بۇزۋ) ايىپتالعان.
- بۇل بيىلدىققا ماعان سالىنىپ وتىرعان ەكىنشى ايىپپۇل. وسىعان دەيىن شىلدە ايىندا WhatsApp چاتتا بەلسەندىلەردى ميتينگىگە شاقىرعانىم ءۇشىن 50 اەك-كە (ايلىق ەسەپتىك كورسەتكىش) تەڭ ايىپپۇل سالىندى. ءوزىمدى كىنالى سانامايمىن. سوندىقتان بۇل ايىپپۇلداردى تولەيتىن نيەتىم جوق. سوتتىڭ الدىڭعى قاۋلىسىنا دا اپەللياسيالىق شاعىم جازعانمىن. وبلىستىق القا شاعىمىمدى قاناعاتتاندىرمادى. ءقازىر ول شاعىم جوعارعى سوتتا. ەكىنشى قاراشا كۇنگى قاۋلىمەن دە كەلىسپەيمىن، - دەيدى ايناگۇل توبەتوۆا.
توبەتوۆا 15 قازان كۇنى جەلىدەگى جەكە پاراقشاسىندا جالاقىنى، زەينەتاقىنى، جاردەماقىنى كوتەرىپ، ساياسي تۇتقىنداردى بوساتۋدى تالاپ ەتەتىن ميتينگىگە شاقىرعان جازبانى بولىسكەن. ونى ءوزى دە راستاپ وتىر. ايتۋىنشا، ول بەيبىت ميتينگ وتكىزەتىنىن حابارلاپ، قالا اكىمدىگىنە بىرنەشە مارتە حابارلاسقان. قالا اكىمدىگى توبەتوۆاعا رۇقسات بەرمەگەن.
"سوت قاۋلىسىمەن ا.توبەتوۆا اقبتك-نىڭ 488-بابىنىڭ 12-بولىگى بويىنشا اكىمشىلىك قۇقىقبۇزۋشىلىق جاساعانى ءۇشىن كىنالى دە تانىلدى جانە وعان قاتىستى 204 190 تەڭگە سوماسىندا ايىپپۇل تۇرىندەگى جازالاۋ شاراسى قولدانىلدى" دەپ جازىلعان اقتوبە وبلىستىق سوتىنىڭ حابارلاماسىندا.
سوت قاۋلىسى 2 قاراشا كۇنى شىققان. ءالى زاڭدى كۇشىنە ەنگەن جوق.
قازاقستاندا بىلتىر "بەيبىت جيىن تۋرالى" جاڭا زاڭ قابىلدانعانمەن قۇقىق قورعاۋشىلار ازاماتتاردىڭ بەيبىت جيىن وتكىزۋ جانە جينالۋ قۇقىعى ءالى شەكتەلىپ وتىرعانىن سىنايدى. كوپ جاعدايدا ازاماتتاردىڭ بەيبىت شەرۋ وتكىزۋ تۋرالى وتىنىشتەرى ورىندالمايدى. بيلىك كوبىنە سول كۇنى وزگە شارا وتەتىنىن نەمەسە ءوتىنىشتىڭ قاجەتتى ەرەجەلەردى ساقتاي وتىرىپ جازىلماعانىن نەمەسە كارانتين شەكتەۋلەردى العا تارتادى. ال "رۇقسات ەتىلمەگەن" شاراعا كەلگەندەر ادەتتە ۇستالىپ، اكىمشىلىك جاۋاپقا تارتىلادى. حالىقارالىق قۇقىق قورعاۋ ۇيىمدارى نۇر-سۇلتاندى اتالعان شەكتەۋلەردى الىپ تاستاۋعا شاقىرعان.
