Abai oblysynyń ákimi Berik Ýáli jazýshy, filologiia ǵylymdarynyń doktory, abaitanýshy, alashtanýshy ǵalym Tursyn Jurtbaimen kezdesti, dep habarlaidy Dalanews.kz
Tursyn Qudakeldiuly kezdesýde aimaq basshysyna óńirdiń tarihy men mádenietine, ádebieti men rýhaniiatyna qatysty oilaryn aitty. Uly Abaidyń 180 jyldyǵyn respýblikalyq deńgeide atap ótýge, Alash murasyn túgendeýge, oblystaǵy tarihi ǵimarattardy saqtaýǵa, jańǵyrtýǵa qatysty pikirlerin ortaǵa saldy.
Semeidegi Abai Qunanbaiuly kitap oqyǵan burynǵy Gogol kitaphanasynyń eski ǵimaratyn memlekettiń qaramaǵyna alý, Alash qairatkerleri Halel Ǵabbasov, Biahmet Sársenov, Ike Ádilulynyń, dańqty diktor Ánýarbek Baijanbaevtyń esimderin ulyqtaý jóninde usynystaryn jetkizdi.
«Joǵaryda atalǵan tulǵalardyń esimderi búginde kómeski tartyp, urpaq jadynan óship barady. Semeide Alash partiiasynyń qurylǵanyn jariialaǵan, alashtyń sezi ótken úi bar. Sony da nazarda ustaý kerek. Ǵulama tarihshy Qurbanǵali Halididiń esimi de, eńbekteri de laiyqty deńgeide ulyqtalmai keledi. Kelesi jyly tarihshynyń 180 jyldyǵy. Onyń jazǵan eńbekteri qazaq tarihy, etnografiiasy úshin asa qundy»,- dedi Tursyn Jurtbai.
Oblys ákimi kezdesýde aitylǵan usynys-pikirlerdiń barlyǵy nazarǵa alynyp, jumys josparyna engiziletinin atap ótti.
«Abai oblysy – uly Abaidyń, ǵulama Shákárimniń, dana Muhtardyń, Alash qairatkerleriniń izi, Ámireniń áýelegen áni qalǵan qasterli meken. Óńirdiń rýhaniiatyna, ádebieti men mádenietine eńbek sińirgen tulǵalardyń esimderin ulyqtaý, shyǵarmalaryn nasihattaýǵa qatysty josparlarymyz bar. Aimaqtaǵy tarihi ǵimarattar da nazardan tys qalmaidy. Bul baǵyttaǵy jumysty bastap ta kettik»,- dedi aimaq basshysy.
