اباي وبلىسىنىڭ اكىمى بەرىك ءۋالي جازۋشى، فيلولوگيا عىلىمدارىنىڭ دوكتورى، ابايتانۋشى، الاشتانۋشى عالىم تۇرسىن جۇرتبايمەن كەزدەستى، دەپ حابارلايدى Dalanews.kz
تۇرسىن قۇداكەلدى ۇلى كەزدەسۋدە ايماق باسشىسىنا ءوڭىردىڭ تاريحى مەن مادەنيەتىنە، ادەبيەتى مەن رۋحانياتىنا قاتىستى ويلارىن ايتتى. ۇلى ابايدىڭ 180 جىلدىعىن رەسپۋبليكالىق دەڭگەيدە اتاپ وتۋگە، الاش مۇراسىن تۇگەندەۋگە، وبلىستاعى تاريحي عيماراتتاردى ساقتاۋعا، جاڭعىرتۋعا قاتىستى پىكىرلەرىن ورتاعا سالدى.
سەمەيدەگى اباي قۇنانباي ۇلى كىتاپ وقىعان بۇرىنعى گوگول كىتاپحاناسىنىڭ ەسكى عيماراتىن مەملەكەتتىڭ قاراماعىنا الۋ، الاش قايراتكەرلەرى حالەل عابباسوۆ، بياحمەت سارسەنوۆ، يكە ءادىل ۇلىنىڭ، داڭقتى ديكتور انۋاربەك بايجانبايەۆتىڭ ەسىمدەرىن ۇلىقتاۋ جونىندە ۇسىنىستارىن جەتكىزدى.
«جوعارىدا اتالعان تۇلعالاردىڭ ەسىمدەرى بۇگىندە كومەسكى تارتىپ، ۇرپاق جادىنان ءوشىپ بارادى. سەمەيدە الاش پارتياسىنىڭ قۇرىلعانىن جاريالاعان، الاشتىڭ سەزى وتكەن ءۇي بار. سونى دا نازاردا ۇستاۋ كەرەك. عۇلاما تاريحشى قۇربانعالي ءحاليديدىڭ ەسىمى دە، ەڭبەكتەرى دە لايىقتى دەڭگەيدە ۇلىقتالماي كەلەدى. كەلەسى جىلى تاريحشىنىڭ 180 جىلدىعى. ونىڭ جازعان ەڭبەكتەرى قازاق تاريحى، ەتنوگرافياسى ءۇشىن اسا قۇندى»،- دەدى تۇرسىن جۇرتباي.
وبلىس اكىمى كەزدەسۋدە ايتىلعان ۇسىنىس-پىكىرلەردىڭ بارلىعى نازارعا الىنىپ، جۇمىس جوسپارىنا ەنگىزىلەتىنىن اتاپ ءوتتى.
«اباي وبلىسى – ۇلى ابايدىڭ، عۇلاما شاكارىمنىڭ، دانا مۇحتاردىڭ، الاش قايراتكەرلەرىنىڭ ءىزى، امىرەنىڭ اۋەلەگەن ءانى قالعان قاستەرلى مەكەن. ءوڭىردىڭ رۋحانياتىنا، ادەبيەتى مەن مادەنيەتىنە ەڭبەك سىڭىرگەن تۇلعالاردىڭ ەسىمدەرىن ۇلىقتاۋ، شىعارمالارىن ناسيحاتتاۋعا قاتىستى جوسپارلارىمىز بار. ايماقتاعى تاريحي عيماراتتار دا نازاردان تىس قالمايدى. بۇل باعىتتاعى جۇمىستى باستاپ تا كەتتىك»،- دەدى ايماق باسشىسى.
