Shyǵys Qazaqstan oblysy ákimdiginiń otyrysynda óńirdegi áleýmettik saiasattyń basym baǵyttarynyń biri – balalar men jasóspirimderdiń jazǵy demalysyn, saýyqtyrylýyn jáne jumyspen qamtylýyn uiymdastyrý máselesi qaraldy, dep habarlaidy Dalanews.kz.
Bilim basqarmasy basshysy Qýat Oqasovtyń aitýynsha, 2026 jyly bul maqsatqa jergilikti biýdjetten 362,1 million teńge bólingen. Qarajattyń basym bóligi áleýmettik osal sanattaǵy balalardy qamtýǵa jáne saýyqtyrý ortalyqtarynyń materialdyq-tehnikalyq bazasyn nyǵaitýǵa baǵyttalady.
Biyl 1–10 synyptarda oqityn 93 myńnan astam balanyń 99,9 paiyzy jazǵy demalyspen, saýyqtyrýmen jáne jumyspen qamtylady. Onyń ishinde kóp balaly jáne az qamtylǵan otbasylardyń balalary tolyq qamtylady.
Óńirde jazǵy demalysty uiymdastyrýdyń birneshe formaty qarastyrylǵan. 10 652 oqýshyny qabyldaityn 12 qala syrtyndaǵy saýyqtyrý ortalyǵy jumys isteidi. Onyń 8-i memlekettik, 4-i jekemenshik. Sonymen qatar, 276 mektep janyndaǵy lagerde 19 218 bala tamaqpen qamtyla otyryp demalady. Budan bólek, 226 beiindik alańda 63 myńnan astam oqýshynyń bos ýaqyty mazmundy uiymdastyrylady.
Jazǵy kezeńde 2 454 pedagog, 250 meditsina qyzmetkeri jáne kolledjder men joǵary oqý oryndarynyń stýdentterinen quralǵan pedagogikalyq jasaqtar jumysqa tartylady.
Balalardyń jazǵy demalysy tek tynyǵýmen shektelmei, olardyń jan-jaqty damýyna baǵyttalady. Qosymsha bilim berý uiymdarynda 27 868 bala úiirmelerge qatysady, jas natýralister stantsiiasynda 750 oqýshy, aýla klýbtarynda 3 500 bala qamtylady. Týristik marshrýttar men ekskýrsiialarǵa 19 986 oqýshy qatysady, al eńbek jáne kásiptik baǵdar berý jobalaryna 11 730 bala tartylady.
Dástúrli túrde óńir oqýshylary respýblikalyq «Bóbek» jáne «Baldáýren» ortalyqtarynda demalady. Sonymen qatar, Buqtyrma sý qoimasynda qaiyqpen saiahat jobasy aiasynda 280 jetim jáne daryndy bala qamtylmaq.
Jiynda balalardyń qaýipsizdigine erekshe nazar aýdaryldy. Osy baǵytta vedomstvoaralyq shtab qurylyp, barlyq qyzmetterdiń úilesimdi jumysy qamtamasyz etilýde. Saýyqtyrý ortalyqtarynda sanitarlyq talaptardy saqtaý, sý aidyndaryndaǵy qaýipsizdik jáne tótenshe jaǵdailardyń aldyn alý boiynsha keshendi sharalar qabyldanýda.
Osy rette oblys ákimi Nurymbet Saqtaǵanov jaýapty organdarǵa naqty mindetter júktedi.
– Sanitariialyq-epidemiologiialyq baqylaý departamenti jazǵy saýyqtyrý maýsymy bastalýyna bailanysty lagerlerdi tekserip, tiisti ruqsat qujattarynyń bolýyn qamtamasyz etýi qajet. Aldyn ala tekserýler júrgizilip, anyqtalǵan eskertýler ýaqytynda joiylǵan jaǵdaida ǵana ruqsat berilýge tiis. Tótenshe jaǵdailar departamenti órt qaýipsizdigin kúsheitip, turaqty baqylaýdy qamtamasyz etsin. Sý aidyndaryndaǵy qaýipsizdik te qatań baqylaýda bolýy qajet. Politsiia departamentine balalardy tasymaldaý kezinde qaýipsizdikti qamtamasyz etý jáne quqyq buzýshylyqtyń aldyn alý tapsyrylsyn. Jalpy, vedomstvoaralyq deńgeide bekitilgen is-sharalar tolyq oryndalyp, jazǵy saýyqtyrý naýqany qatań baqylaýda bolýǵa tiis, - dedi aimaq basshysy.
Osylaisha, óńirde biylǵy jazǵy demalys maýsymy balalardy barynsha qamtýǵa, olardyń qaýipsizdigin qamtamasyz etýge jáne mazmundy bos ýaqyt uiymdastyrýǵa baǵyttalǵan júieli sharalarmen iske asyrylmaq.
