شىعىس قازاقستان وبلىسى اكىمدىگىنىڭ وتىرىسىندا وڭىردەگى الەۋمەتتىك ساياساتتىڭ باسىم باعىتتارىنىڭ ءبىرى – بالالار مەن جاسوسپىرىمدەردىڭ جازعى دەمالىسىن، ساۋىقتىرىلۋىن جانە جۇمىسپەن قامتىلۋىن ۇيىمداستىرۋ ماسەلەسى قارالدى، دەپ حابارلايدى Dalanews.kz.
ءبىلىم باسقارماسى باسشىسى قۋات وقاسوۆتىڭ ايتۋىنشا، 2026 جىلى بۇل ماقساتقا جەرگىلىكتى بيۋدجەتتەن 362،1 ميلليون تەڭگە بولىنگەن. قاراجاتتىڭ باسىم بولىگى الەۋمەتتىك وسال ساناتتاعى بالالاردى قامتۋعا جانە ساۋىقتىرۋ ورتالىقتارىنىڭ ماتەريالدىق-تەحنيكالىق بازاسىن نىعايتۋعا باعىتتالادى.
بيىل 1–10 سىنىپتاردا وقيتىن 93 مىڭنان استام بالانىڭ 99،9 پايىزى جازعى دەمالىسپەن، ساۋىقتىرۋمەن جانە جۇمىسپەن قامتىلادى. ونىڭ ىشىندە كوپ بالالى جانە از قامتىلعان وتباسىلاردىڭ بالالارى تولىق قامتىلادى.
وڭىردە جازعى دەمالىستى ۇيىمداستىرۋدىڭ بىرنەشە فورماتى قاراستىرىلعان. 10 652 وقۋشىنى قابىلدايتىن 12 قالا سىرتىنداعى ساۋىقتىرۋ ورتالىعى جۇمىس ىستەيدى. ونىڭ 8ء-ى مەملەكەتتىك، 4ء-ى جەكەمەنشىك. سونىمەن قاتار، 276 مەكتەپ جانىنداعى لاگەردە 19 218 بالا تاماقپەن قامتىلا وتىرىپ دەمالادى. بۇدان بولەك، 226 بەيىندىك الاڭدا 63 مىڭنان استام وقۋشىنىڭ بوس ۋاقىتى مازمۇندى ۇيىمداستىرىلادى.
جازعى كەزەڭدە 2 454 پەداگوگ، 250 مەديسينا قىزمەتكەرى جانە كوللەدجدەر مەن جوعارى وقۋ ورىندارىنىڭ ستۋدەنتتەرىنەن قۇرالعان پەداگوگيكالىق جاساقتار جۇمىسقا تارتىلادى.
بالالاردىڭ جازعى دەمالىسى تەك تىنىعۋمەن شەكتەلمەي، ولاردىڭ جان-جاقتى دامۋىنا باعىتتالادى. قوسىمشا ءبىلىم بەرۋ ۇيىمدارىندا 27 868 بالا ۇيىرمەلەرگە قاتىسادى، جاس ناتۋراليستەر ستانسياسىندا 750 وقۋشى، اۋلا كلۋبتارىندا 3 500 بالا قامتىلادى. تۋريستىك مارشرۋتتار مەن ەكسكۋرسيالارعا 19 986 وقۋشى قاتىسادى، ال ەڭبەك جانە كاسىپتىك باعدار بەرۋ جوبالارىنا 11 730 بالا تارتىلادى.
ءداستۇرلى تۇردە ءوڭىر وقۋشىلارى رەسپۋبليكالىق «بوبەك» جانە «بالداۋرەن» ورتالىقتارىندا دەمالادى. سونىمەن قاتار، بۇقتىرما سۋ قويماسىندا قايىقپەن ساياحات جوباسى اياسىندا 280 جەتىم جانە دارىندى بالا قامتىلماق.
جيىندا بالالاردىڭ قاۋىپسىزدىگىنە ەرەكشە نازار اۋدارىلدى. وسى باعىتتا ۆەدومستۆوارالىق شتاب قۇرىلىپ، بارلىق قىزمەتتەردىڭ ۇيلەسىمدى جۇمىسى قامتاماسىز ەتىلۋدە. ساۋىقتىرۋ ورتالىقتارىندا سانيتارلىق تالاپتاردى ساقتاۋ، سۋ ايدىندارىنداعى قاۋىپسىزدىك جانە توتەنشە جاعدايلاردىڭ الدىن الۋ بويىنشا كەشەندى شارالار قابىلدانۋدا.
وسى رەتتە وبلىس اكىمى نۇرىمبەت ساقتاعانوۆ جاۋاپتى ورگاندارعا ناقتى مىندەتتەر جۇكتەدى.
– سانيتاريالىق-ەپيدەميولوگيالىق باقىلاۋ دەپارتامەنتى جازعى ساۋىقتىرۋ ماۋسىمى باستالۋىنا بايلانىستى لاگەرلەردى تەكسەرىپ، ءتيىستى رۇقسات قۇجاتتارىنىڭ بولۋىن قامتاماسىز ەتۋى قاجەت. الدىن الا تەكسەرۋلەر جۇرگىزىلىپ، انىقتالعان ەسكەرتۋلەر ۋاقىتىندا جويىلعان جاعدايدا عانا رۇقسات بەرىلۋگە ءتيىس. توتەنشە جاعدايلار دەپارتامەنتى ءورت قاۋىپسىزدىگىن كۇشەيتىپ، تۇراقتى باقىلاۋدى قامتاماسىز ەتسىن. سۋ ايدىندارىنداعى قاۋىپسىزدىك تە قاتاڭ باقىلاۋدا بولۋى قاجەت. پوليسيا دەپارتامەنتىنە بالالاردى تاسىمالداۋ كەزىندە قاۋىپسىزدىكتى قامتاماسىز ەتۋ جانە قۇقىق بۇزۋشىلىقتىڭ الدىن الۋ تاپسىرىلسىن. جالپى، ۆەدومستۆوارالىق دەڭگەيدە بەكىتىلگەن ءىس-شارالار تولىق ورىندالىپ، جازعى ساۋىقتىرۋ ناۋقانى قاتاڭ باقىلاۋدا بولۋعا ءتيىس، - دەدى ايماق باسشىسى.
وسىلايشا، وڭىردە بيىلعى جازعى دەمالىس ماۋسىمى بالالاردى بارىنشا قامتۋعا، ولاردىڭ قاۋىپسىزدىگىن قامتاماسىز ەتۋگە جانە مازمۇندى بوس ۋاقىت ۇيىمداستىرۋعا باعىتتالعان جۇيەلى شارالارمەن ىسكە اسىرىلماق.
