Búginde jyl basyndaǵy Prezidenttiń tapsyrmasy birtindep iske asyp jatyr. Osy rette QR Ǵylym jáne joǵary bilim ministrligine qarasty Ǵylym komiteti elimizdegi ǵylymmen ainalysatyn jastardyń úlesin 50%-ǵa deiin arttyrýǵa bel býyp, bilek sybana kiriskenin airyqsha atap aitýǵa bolady.
Ǵylym komitetiniń tóraǵasy Darhan Ahmed-Zaki jyl saiyn ǵylymi-zertteý jumystarymen ainalysatyn 1000 jastyń ǵylylymi jumysyna qoldaý kórsetýdi kózdep otyrǵandaryn jariia etti. Memlekettik deńgeide qabyldaǵan bul sheshim jastardyń ǵylymi-zertteý jumystarymen alańsyz ainalysýyna múmkindik týǵyzatyny anyq.
Búginde elimizde ǵylymi jumystardy kommertsiialaý deńgeii óte tómen ekeni jasyryn emes. Elimizde ǵylym men óndiristiń úilesimdi jumys istei almai otyrǵanynyń birneshe basty sebebi bar.
Keńes zamanynda ǵalamdardyń ǵylymi jumystarynyń óndiriste qoldanýana memleket jaýapty boldy. Sondyqtan ǵylymi jumystyń óndiriske enýine ǵalamdar bas qatyrǵan joq. Ǵalymdar ózderiniń ǵylymi jumystarymen alańsyz ainalysty.
Al naryq qatynastar ornaǵan sátte bul úrdis tolyqtai kúiredi. Osy aralyqta ǵylymǵa bólinetin qarjy mardymsyz bolǵannan keiin jastardyń ǵylymǵa qyzyǵýshylyǵy kúrt azaiǵany da jasyryn emes.
Budan basqa ǵylymdaǵy aǵa býyn ǵylymi-zertteý jumystaryn kommertsiialaý isimen múlde ainalyspady. Týrasyn aitsaq, ǵylymdaǵy aǵa býyn kommertsiialaý isine daiyn bolmady. Olar Keńes zamanyndaǵydai alma «pis azýyma tús» dep otyrdy. Osylaisha aǵa býynnyń áreketsizdigi qazaq ǵylymy toqyraýǵa ushyratty.
Ǵylymnyń aianyshty kúige túskenin kórgen Memleket basshysy Qasym-Jomart Toqaev salada keshendi sharalar qabyldap, ǵylymi-zertteý jumystaryn kommertsiialaýda jastarǵa airyqsha senim artyp otyrǵanyn baiqaýǵa bolady.
Búginde sheteldiń aldyńǵy qatarly oqý oryndarynda bilim alǵan qazaq jastary qazaq ǵylymyn alǵa súireitin múmkindikke ie. Qazir ǵylymmen ainalysyp júrgen jastar bir jerde otyrmaidy. Olar ózderiniń ǵylymi-zertteý jumystaryn kommertsiialaýǵa múddeli. Bul úshin olar túrli investorlarmen sóilesip, iri kompaniialardyń esigin qaǵýǵa arlanbaidy.
Qazirgi jastar ózderin ǵylymda izdenýshi, ǵylymi-zertteý jumystaryn kommertsiialaýda kánigi maman menedjer bolýy kerek ekenin túsinedi. Aǵa býyn sekildi ǵylymi jumystaryn kommertsiialaýǵa óte enjar emes.
Aldaǵy ýaqytta memleket 1000 jastyń ǵylymi-zertteý jumysyna grant bólse, olar ǵylym salasynda talmai izdenip, ózi jumystaryn kommertsiialaǵansha tynym tappaityny anyq.
Ǵylymdy kommertsiialaý isi qazaq ǵylymynda býyn almasýy qarqyndy júrip jatqanyn aiqyn kórsetedi. Damyǵan elderdegi oqý oryndarda bilim alyp, taǵylymdamadan ótken jastarymyz sol jaqtaǵy ǵylymdaǵy tehnologiialyq úrdisterdiń elge ákelýge bar kúsh-jigerin jumsaityny anyq. Bul úshin ǵylymi-zertteý jumystarymen ainalysyp júrgen jastarǵa barynsha qoldaý kórsetýimiz kerek.
