Joǵarǵy sottyń eks-tóraǵasy Jaqyp Asanov izdeýde júrgen burynǵy keńesshisi Qarlyǵash Tátkeevaǵa qatysty pikir bildirdi, dep habarlaidy Dalanews.kz Nege.Aqsha telegram arnasyna silteme jasap.
Asanovtyń aitýynsha, eks-keńesshisi Joǵarǵy sotqa qalalyq sottan issaparmen jiberilgen. Ol kezde Tátkeeva qyzmettegi sýdia bolǵan.
“Onyń izdeýde júrgenin baspasóz qyzmeti arqyly ǵana estidim. Joǵarǵy sotta tórt hatshylyq bar, onda shamamen jiyrmaǵa jýyq qyzmetker jumys isteidi. Olardyń barlyǵyn shartty túrde keńesshi deýge bolady. Sebebi negizgi mindetteri – sot isterimen tanysyp, sol boiynsha pikir bildirý. Alaida sot tóraǵasy retinde men tikelei tek hatshylyqtyń meńgerýshisi men onyń orynbasarymen jumys istedim. Sol sebepti Qarlyǵash Tátkeeva týraly naqty eshteńe aita almaimyn. Onymen jeke qyzmettik qarym-qatynasym bolmaǵan”, – dedi Jaqyp Asanov.
Nege.Aqsha derekkóziniń málimetinshe, Tátkeeva alaiaqtyq isine bailanysty tergeý aiasynda kúdikke ilingen. Naqtyraq aitqanda, ol 500 myń AQSh dollaryna sot daýyn sheship beremin dep ýáde bergen kórinedi. Alaida ýádesin oryndai almaǵan soń, aqshany deldaldar arqyly qaitarǵan. Biraq deldaldar qarajattyń bir bóligin ǵana iesine jetkizgen desedi. Osyǵan bailanysty jábirlenýshi politsiiaǵa aryz jazǵan. Buny estigen Tátkeeva izin sýytqan. Atalǵan aqparat resmi túrde rastalmaǵan.
Aita keteiik, buǵan deiin eks-sýdia Qarlyǵash Tátkeevaǵa izdeý jariialanǵany týraly jazǵan edik.
Resmi málimetke sáikes, Qarlyǵash Qurmashqyzy Tátkeeva 2025 jyldyń 20 maýsymynan beri izdeýde. Is Qaraǵandy oblysynda tirkelgen. Izdeý jumystaryn QR Sybailas jemqorlyqqa qarsy is-qimyl agenttiginiń oblystyq departamentijúrgizip jatyr. Bul derek quqyqtyq statistika jáne arnaiy esepke alý organdarynyń portalynda jariialanǵan.
Tátkeeva Joǵarǵy Sotty Jaqyp Asanov basqarǵan kezeńde azamattyq ister boiynsha tóraǵanyń keńesshisi qyzmetin atqarǵan. Sonymen qatar ol ár jyldary Qaraǵandy oblysynyń mamandandyrylǵan aýdanaralyq ekonomikalyq sotynda jáne Astana qalasynyń sotynda sýdia bolǵan.
