جوعارعى سوتتىڭ ەكس-توراعاسى جاقىپ اسانوۆ ىزدەۋدە جۇرگەن بۇرىنعى كەڭەسشىسى قارلىعاش تاتكەيەۆاعا قاتىستى پىكىر ءبىلدىردى، دەپ حابارلايدى Dalanews.kz Nege.Aqsha تەلەگرام ارناسىنا سىلتەمە جاساپ.
اسانوۆتىڭ ايتۋىنشا، ەكس-كەڭەسشىسى جوعارعى سوتقا قالالىق سوتتان ىسساپارمەن جىبەرىلگەن. ول كەزدە تاتكەيەۆا قىزمەتتەگى سۋديا بولعان.
“ونىڭ ىزدەۋدە جۇرگەنىن باسپا ءسوز قىزمەتى ارقىلى عانا ەستىدىم. جوعارعى سوتتا ءتورت حاتشىلىق بار، وندا شامامەن جيىرماعا جۋىق قىزمەتكەر جۇمىس ىستەيدى. ولاردىڭ بارلىعىن شارتتى تۇردە كەڭەسشى دەۋگە بولادى. سەبەبى نەگىزگى مىندەتتەرى – سوت ىستەرىمەن تانىسىپ، سول بويىنشا پىكىر ءبىلدىرۋ. الايدا سوت ءتوراعاسى رەتىندە مەن تىكەلەي تەك حاتشىلىقتىڭ مەڭگەرۋشىسى مەن ونىڭ ورىنباسارىمەن جۇمىس ىستەدىم. سول سەبەپتى قارلىعاش تاتكەيەۆا تۋرالى ناقتى ەشتەڭە ايتا المايمىن. ونىمەن جەكە قىزمەتتىك قارىم-قاتىناسىم بولماعان”، – دەدى جاقىپ اسانوۆ.
Nege.Aqsha دەرەككوزىنىڭ مالىمەتىنشە، تاتكەيەۆا الاياقتىق ىسىنە بايلانىستى تەرگەۋ اياسىندا كۇدىككە ىلىنگەن. ناقتىراق ايتقاندا، ول 500 مىڭ اقش دوللارىنا سوت داۋىن شەشىپ بەرەمىن دەپ ۋادە بەرگەن كورىنەدى. الايدا ۋادەسىن ورىنداي الماعان سوڭ، اقشانى دەلدالدار ارقىلى قايتارعان. ءبىراق دەلدالدار قاراجاتتىڭ ءبىر بولىگىن عانا يەسىنە جەتكىزگەن دەسەدى. وسىعان بايلانىستى جابىرلەنۋشى پوليسياعا ارىز جازعان. بۇنى ەستىگەن تاتكەيەۆا ءىزىن سۋىتقان. اتالعان اقپارات رەسمي تۇردە راستالماعان.
ايتا كەتەيىك، بۇعان دەيىن ەكس-سۋديا قارلىعاش تاتكەيەۆاعا ىزدەۋ جاريالانعانى تۋرالى جازعان ەدىك.
رەسمي مالىمەتكە سايكەس، قارلىعاش قۇرماش قىزى تاتكەيەۆا 2025 جىلدىڭ 20 ماۋسىمىنان بەرى ىزدەۋدە. ءىس قاراعاندى وبلىسىندا تىركەلگەن. ىزدەۋ جۇمىستارىن ق ر سىبايلاس جەمقورلىققا قارسى ءىس-قيمىل اگەنتتىگىنىڭ وبلىستىق دەپارتامەنتىجۇرگىزىپ جاتىر. بۇل دەرەك قۇقىقتىق ستاتيستيكا جانە ارنايى ەسەپكە الۋ ورگاندارىنىڭ پورتالىندا جاريالانعان.
تاتكەيەۆا جوعارعى سوتتى جاقىپ اسانوۆ باسقارعان كەزەڭدە ازاماتتىق ىستەر بويىنشا ءتوراعانىڭ كەڭەسشىسى قىزمەتىن اتقارعان. سونىمەن قاتار ول ءار جىلدارى قاراعاندى وبلىسىنىڭ مامانداندىرىلعان اۋدانارالىق ەكونوميكالىق سوتىندا جانە استانا قالاسىنىڭ سوتىندا سۋديا بولعان.
