Qyrǵyzstannyń burynǵy prezidenti Almazbek Atambaev memlekettik marapattarynan aiyryldy. Bul týraly el prezidenti Sadyr Japarov tiisti jarlyqqa qol qoidy, dep habarlaidy Dalanews.kz.
Qujatqa sáikes, Almazbek Atambaevtan Qyrǵyz Respýblikasynyń eń joǵary airyqsha belgisi – «Qyrgyz Respýblikasynyn Baatyry» ataǵy, sondai-aq «Manas» ordeniniń II dárejesi, «Danaker» ordeni jáne «Dank» medali keri qaitaryldy.
Budan bólek, atalǵan marapattardy berýge negiz bolǵan birqatar burynǵy prezidenttik jarlyqtardyń kúshi joiyldy. Atap aitqanda, 1999, 2007, 2011 jáne 2017 jyldary qabyldanǵan normativtik aktiler endi jaramsyz dep tanyldy.
Eske salaiyq, Qyrǵyzstannyń burynǵy prezidenti Almazbek Atambaev 11 jylǵa sottalǵan bolatyn. Bishkektegi Birinshi Mai aýdandyq soty Qoi-Tash oqiǵasyna qatysty atyshýly is boiynsha úkim shyǵardy. Bul is bes jyldan astam ýaqyt boiy qaralyp kelgen edi.
Aita keteiik, buǵan deiin Qyrǵyzstan soty jappai tártipsizdikterge qatysty qylmystyq is boiynsha burynǵy prezident Almazbek Atambaevtyń ulyn eki aiǵa qamaýǵa alǵan bolatyn.
Bishkek qalasynyń sotynda jappai tártipsizdikterge qatysty qylmystyq is boiynsha kúdiktiler tobyna bultartpaý sharasyn ózgertý týraly tergeý tarapynyń ótinishi qaraldy. Aldymen sot tergeý ótinishin qanaǵattandyryp, Temirlan Sýltanbekov, Ermek Ermatov jáne Ýrmat Askarbekovty (Ýrmat Baryktabasov tegi ózgergen) qamaýǵa alý týraly sheshim shyǵardy. Olar 17 qańtarǵa deiin tergeý abaqtysyna qamaldy.
Sot sheshimimen 17 qańtarǵa deiin Qyrǵyzstannyń burynǵy prezidentiniń uly Kadyrbek Atambaev, sondai-aq Shailoobek Atazov pen Kýbanychbek Kadyrov ta qamaýǵa alyndy.
Eldiń burynǵy prezidentiniń uly aiyptyń aýyr túrge qaita qoiylǵanyn habarlady. Endi oǵan bilikti kúshpen qulatý áreketi taǵylǵan.
