Úkim Astana qalasy Saryarqa aýdanynyń №2 sotynda jariialandy.
Sot sheshimimen Eljan Birtanov 5 jylǵa, Oljas Ábishev 4 jylǵa shartty túrde bas bostandyǵyn shekteý jazasyna kesildi.
"Sot Eljan Birtanovty qylmystyq kodekstiń 361-baby 3-bóligi boiynsha sanitarlyq aviatsiia ushaǵyn qoldanǵany úshin kinásiz dep tanydy. Eljan Birtanov pen Oljas Ábishevti qylmystyq kodekstiń 361-baby 4-bóligi 3-tarmaǵy boiynsha kináli dep tanyp, Birtanovty 5 jylǵa bas bostandyǵyn shekteýge, Oljas Ábishevke 4 jylǵa bas bostandyǵyn shekteý týraly úkim shyǵardy, - delingen sot úkiminde.
Olarǵa probatsiialyq baqylaý qoiylady. Sondai-aq ekeýi de ómir boiyna memlekettik qyzmette jumys isteý quqyǵynan aiyryldy.
Sondai-aq Oljas Ábishev jazanyń negizgi bóligin ótegenshe jyl saiyn 100 saǵat májbúrli eńbekke jumysqa tartylady.
Sottalǵandarǵa Qylmystyq kodekstiń 44-babynyń 2-bóliginde kózdelgen mindetter júkteldi. Soǵan sáikes, sottalǵandar olardyń minez-qulqyn baqylaityn ýákiletti memlekettik organǵa habarlamai, jumys orny men turǵylyqty mekenjaiyn ózgertpeýi qajet. Jumystan bos ýaqytta turǵylyqty jerinen, basqa aimaqtarǵa barýǵa bolmaidy.
Sondai-aq Densaýlyq saqtaý ministrliginiń azamattyq aryzy jartylai qanaǵattandaryldy.
Birtanov pen Ábishev 1 milliard 350 million 123 myń teńgeniniń materialdyq shyǵynyn ótep berýge mindetteldi.
Aita keteiik, eks-ministr sot úkimi shyqpastan buryn kóńil kúii jaqsy ekenin jetkizdi.
"Kóńil kúiim óte jaqsy. Sebebi advokattar jaqsy jumys istedi dep senemiz. Búgingi sot sheshimi ádiletti bolady dep senemiz. Meni, Oljas Ábishevti sot bostady dep senemiz. Jańa Qazaqstanǵa, ádiletti Qazaqstanǵa senemiz. Biz eshqandai da jemqor emespiz. Biz halyq jaýy emespiz", - dedi Eljan Birtanov.
Sondai-aq sot protsesi ótip jatqan ǵimarat ishi lyq toldy. Olar Birtanov pen Ábishevti bosatýdy surady.
Buǵan deiin memlekettik aiyptaýshy burynǵy Densaýlyq saqtaý ministri Eljan Birtanovty 6 jylǵa bas bostandyǵynan aiyrýdy surady.
Sondai-aq prokýror Birtanov pen onyń burynǵy orynbasary Oljas Ábishevten 1,5 milliard teńge óndirip alýdy surady.
Odan bólek, Birtanovtan sanitarlyq aviatsiia bortyn paidalanýǵa jumsalǵan 5 mln 503 myń 721 teńge óndirip alýdy usyndy.
https://dalanews.kz/news/82859-zhetisu-oblysynda-dini-akhualga-turaqt
https://dalanews.kz/ekonomika/82850-freedom-kompaniiasy-manggystau-ongirindegi-tu
