Qazaqstannyń óńir-óńirindegi ákimdikter Jańa jyl merekesine biýdjetten 1,5 mlrd teńge jumsaýdy josparlap otyr, dep habarlaidy Dalanews.kz.
FBRK telegram arnasy solardyń birqataryna sholý jasady.
Derekkóz usynǵan aqparatqa sáikes, Semeide kontserttik baǵdarlamaǵa 10 mln teńge, al merekelik bezendirý jumystaryna 55 mln teńge bólýdi josparlap otyr. Kókshetaýda jalpy shyǵynnyń 55,4 mln teńgege deiin jetetini habarlandy.
Qostanaida merekelik sharalarǵa 86 mln teńge qarastyrylǵan. Onyń basym bóligi muzdan qalashyq jasaýǵa jumsalady. Degenmen qys kesh kelgendikten, muz qalashyǵy jasalmaýy da múmkin.
Astanada merekege aldyn ala boljam boiynsha 365 mln teńge qarastyrylǵan. Qarjy qalanyń aýdandary arasynda bólinedi: Baiqonyr, Saraishyq, Saryarqa jáne Almaty aýdandarynyń árqaisyna 50 mln teńge, Esilge — 90 mln, Nurǵa — 75 mln teńge. Aita keteiik, 2026 jylǵy Jańa jylǵa Astana 2025 jylmen salystyrǵanda shamamen eki ese az qarajat bólgen.
Óskemende merekelik sharalarǵa shamamen 140 mln teńge bólinedi. Onyń jartysy qala kórkemdeýine, qalǵany merekelik baǵdarlamaǵa jumsalady.
Shymkentte ákimdik ókilderiniń aitýynsha, 166 mln teńge jumsaý josparlanyp otyr. Qarjy mádeniet basqarmasy, aýdandyq is-sharalar jáne qalany Jańa jylǵa bezendirýge bólinedi.
Almaty qalasy jalpy shyǵysy boiynsha alda keledi. Qala jalpy smetasyn jariialamaǵanymen, belgili bolǵandai, Alataý aýdanynda 100 mln teńge, Túrksibte — 200 mln, Naýryzbaida — 92,3 mln, Medeýde — 160 mln teńge qarastyrylǵan. Ákimdik sońǵy shyǵyndar konkýrstyq rásimder aiaqtalǵannan keiin belgili bolatynyn habarlady.
“Osylaisha, Qazaqstannyń óńirleri Jańa jyl merekesine shamamen 1,5 mlrd teńge jumsaýy múmkin. Degenmen bul aldyn ala esep, óitkeni keibir oblystardan alynǵan málimetter tolyq emes nemese naqtylaýdy qajet etedi”, — deidi derekkóz.
Eske salsaq, buǵan deiin Petropavl qalasynyń mádeniet bólimi Jańa jyl merekesine arnalǵan qalanyń basty shyrshasyn jaǵý rásimin beinematerialǵa túsirý jáne montajdaý úshin 2,5 mln teńge suraǵan edi.
Bul ótinim qalalyq máslihat otyrysynda qyzý talqylanǵan. Depýtattar bólim usynǵan smeta aitarlyqtai asyra baǵalanǵanyn atap ótti.
Keiin Óskemenniń turǵyn úi-kommýnaldyq sharýashylyq, jolaýshy tasymaly jáne avtokólik joldary bólimi kósheler men qoǵamdyq oryndardy jańa jyldyq bezendirý úshin tender jariialady. Jumys quny 71,5 mln teńge dep baǵalandy.
Aita keteiik, buǵan deiin Dalanews.kz Qaraǵandy oblysynda Osakarov aýdany ákimdigine qarasty mekeme jańa jyldyq shyrsha oiynshyqtaryn satyp alýǵa biýdjetten 3 million 767 myń 900 teńge jumsamaqshy ekenin jazǵan edi.
