Jolaýshy sanyna esepteletin tarif negizindegi sýbsidiialaý modeli ózgermek. Endi, onyń ornyna marshrýttyń eseptik qunyna negizdelgen model engiziledi. Iaǵni, tasymaldaýshy kúnine júrgen qashyqtyǵyna qarai qarjy alady. Mundai ózgeris avtobýs júrgizýshilerin jelide barynsha uzaq ýaqyt bolýǵa yntalandyra túspek. Bul týraly óńirlik kommýnikatsiialar qyzmetinde ótken brifingte Semei qalasy ákiminiń orynbasary Ádilet Turysbek málimdedi, – dep habarlaidy Dalanews.kz Abai oblysy ákiminiń baspasóz qyzmetine silteme jasap.
– Salystyrmaly túrde aitsaq, Abai oblysy qurylǵanǵa deiin tehnikanyń marshrýttarǵa shyǵý paiyzy 50%-dan aspaityn. Bul másele halyqty tasymaldaý sapasyna aitarlyqtai áser etti. Desede oblys qurylǵannan keiin biz, bul máseleniń sheshim neǵurlym jedel sheshýge tyrystyq. Qazirgi ýaqytta avtobýstardyń jelige shyǵý paiyzy 75%-dan tómen emes jáne turaqty deńgeide saqtalýda, – deidi Ádilet Turysbek.
Sonymen qatar, ákim orynbasary óz sózinde aldaǵy sýbsidiialaý ózgerisi avtoparkterdiń qozǵalys quramyn jańartýǵa múmkindik beretinin jetkizdi.
– Qalanyń barlyq marshrýttarynda elektrondy bilet júiesi iske qosylǵan. Birikken dispetcherlik jáne baqylaý qyzmeti boiynsha aitsaq, qala ákimdiginiń Jolaýshylar kóligi jáne avtomobil joldary bólimi jáne Jolaýshylar tasymaly basqarmasy ortalyǵy kelisimshart jasasqan. Barlyq aqparat sol jerden tapsyrys berýshige berilip, osy málimetter negizinde qarajat máselesi retteledi, – dedi spiker.
JK jáne AJ bóliminiń Jolaýshylar kóligi sektorynyń meńgerýshisi Arman Jolamanov avtobýs qozǵalysynyń aralyqtary men turaqtylyǵynyń buzylý máselelerinen habardar ekenin atap ótti.
– Qozǵalys turaqtylyǵynyń júiesi buzylǵan jaǵdaida, biz sýbsidiialaý erejelerine sáikes, jospardyń oryndalýyna qarai teńdei sýbsidiia somasyn azaitýǵa quqylymyz. Mundai jaǵdailardy biz nazardan tys qaldyrmaimyz. Qazirgi tańda, jolaýshylar tasymalyn basqarý ortalyǵy bizge ár marshrýt boiynsha jospardyń qansha paiyzǵa oryndalǵany týraly málimet berip otyrady, – dep tolyqtyrdy Jolaýshylar kóligi sektorynyń meńgerýshisi.
Marshrýttyq jelilerdi ońtailandyrý jáne jańa jelilerdi ázirlenbek. Bul týraly Semei qalasynyń Jolaýshylar kóligi jáne avtomobil joldary bóliminiń basshysy mindetin atqarýshy Ádilbek Ývasilov tolyǵyraq túsindirdi.
– 2025 jyly qalada marshrýttyq jelilerdi ońtailandyrý josparlanýda. Marshrýttarǵa bailanysty barlyq máseleler zerttelip, ǵylymi turǵyda qarastyrylady, – dedi Ádilbek Ývasilov.
