Eńbek jáne áleýmettik qorǵaý ministrligi búgin birqatar qyzyq málimettermen bólisti. Máselen, 2024 jylǵy 1 jeltoqsandaǵy jaǵdai boiynsha jumyspen qamtýǵa járdemdesý sharalaryna 627,6 myń qazaqstandyq qatysqan. Nátijesinde 496,2 myń adam jumyspen qamtyldy, onyń 311,1 myńy turaqty jumysqa ornalasty, dep jazady Dalanews.kz.
Naqtyraq aitsaq, sýbsidiialanatyn jumys oryndaryna 185,1 myń adam ornalastyryldy. Onyń ishinde:
- áleýmettik jumys oryndarynda - 15,5 myń adam,
- jastar praktikasynda - 32,2 myń adam,
- qoǵamdyq jumystarda - 108,4 myń adam,
- "Alǵashqy jumys orny" jobasy aiasynda 9,5 myń adam,
- "Urpaqtar kelisimsharty" jobasy aiasynda 417 adam,
- "Kúmis jas" jobasy aiasynda 19 myń adam jumyspen qamtyldy.
"Budan basqa, jańa biznes-bastamalardy iske asyrý úshin 2024 jyldyń basynan bastap halyqtyń áleýmettik osal sanattaryna 400 AEK deiingi (1 476 800 teńge) mólsherde 8 941 grant berildi", - deidi EHÁQM baspasóz qyzmeti.
Sondai-aq eńbek naryǵynda suranysqa ie daǵdylar boiynsha onlain oqytýmen 55,2 myń jumyssyz qamtyldy, onyń ishinde 50,1 myńy oqýdy aiaqtady.
Al "Bastaý Biznes" jobasy boiynsha kásipkerlik negizderine oqytýmen 57,5 myń adam qamtyldy, onyń ishinde 36,6 myń adam oqýdy aiaqtap, sertifikattar aldy.
Qyzmet salasyn tańdaý maqsatynda 202,4 myń adam áleýmettik kásiptik baǵdarlaýdan ótti.
