Bul elimiz úshin tarihi sátterdiń biri desek te bolady. Osy kúndi halqymyz uzaq kútken bolatyn. Endi mine, san ǵasyr boiy armandap kelgen tól jazýymyzdy jańǵyrtýǵa qol jetkizdik.
«Qazaq tili álipbiin latyn grafikasyna kóshirdik, osymen is támam demeýimiz kerek. Muny biz jumystyń basy dep qabyldaýymyz qajet» – Til saraiynda ótken «Jańa álipbi – uly dáýir bastaýy» atty jiynda Almaty oblysynyń tilderdi damytý jónindegi basqarmasynyń basshysy Aidar Bashbaev osylai dedi.
Assambleia ókilderi, ardagerler, oblystyq basqarma, «Nur Otan» partiiasynyń ókilderi, qazaq tiliniń álipbiin latyn grafikasy negizindegi álipbige kóshirý jónindegi jumys tobynyń músheleri, Til basqarmasynyń mamandary, «Til» oqytý-ádistemelik ortalyǵynyń oqytýshylary jáne BAQ ókilderi qatysqan jiyn barysynda qazaq tili álipbiin kirillitsadan latyn grafikasyna kóshirý týraly máselege qatysty oilar ortaǵa salyndy.
– Qazaqstan Respýblikasynyń Prezidenti Nursultan Nazarbaevtyń latyn álipbiine kóshý týraly Jarlyǵyn Qazaqstan Respýblikasyndaǵy eń úlken oqiǵanyń biri dep aitsaq bolady. Álemniń 90 paiyzy qoldanyp otyrǵan álipbige Qazaqstannyń da kirigýi elimiz úshin zor mártebe. Negizinde, biz latyn álipbiin qoldanýdy jańa bastap jatqamyz joq. Bizdiń ata-babalarymyz osy jazýdy qoldanǵanyn jaqsy bilemiz. Endeshe, Elbasymyz ótkendi qaita jańǵyrtý arqyly latyn álipbiiniń jańa nusqasyn bekitti. Jańa álipbi – uly dáýir bastaýyna aparar sara jol bolmaq, – degen basqarma basshysy Aidar Karbozuly jańa álipbidi qoldanysqa engizýde atqarylar jumystar boiynsha esh kederginiń bolmaitynyn da aitty.
Munan keiin qalalyq «Taldyqorǵan» gazetiniń bas redaktory Daniiar Seisenbaev sóz aldy. «Jańa álipbidi engize otyryp biz sanada jańalyq jasadyq. Printsiptik turǵyda álipbiimizdi qabyldadyq. Bul elimizdiń rýhani jańǵyrýyndaǵy jańa qadam dep esepteýge bolady», – degen Daniiar Bolysbekuly Taldyqorǵan gazetiniń sońǵy eki nómirine joba retinde birneshe maqalany latyn álipbiiniń nusqalarynda jazǵandyǵyn aitty. Bolashaqta da osy jumystar qarqyndy túrde jalǵasyn tabady dedi.
«Qazaq tili álipbiin latyn grafikasyna kóshirýdi – táýelsizdiktiń jemisi ári jetken jeńisi dep bilemin», – deidi oblystyq «Jetisý» gazetiniń tilshisi Máýlen Ánerbaev. –Eń bastysy álipbiimizdi qabyldadyq. Al bolashaqta atqarylar jumys shash etekten. Sondyqtan, barlyqtaryńyzdy jańa bastamaǵa qoldaý tanytyp, birigip jumys jasaýǵa shaqyramyn, – dedi ol.
Jiyn barysynda sóz alǵandardyń derligi endi sózben emes, bilek sybanyp is-qimyl tanytatyn kezeń kelgenin aitty. Sondai-aq, memlekettik tilimizdi búkil qoǵamdyq salada erkin qoldanylatyn dara, negizgi, ári jumystyń, ári qarym-qatynastyń quralyna ainaldyrýymyz kerek degen oi túiisti.
Jiyndy qorytyndylaǵan qazaq tiliniń álipbiin latyn grafikasy negizindegi álipbige kóshirý jónindegi Almaty oblysy boiynsha jumys tobynyń jetekshisi Aidar Karbozuly osyǵan deiin top músheleri aimaqqa qarasty toǵyz aýdanda bolyp, halyqqa túsindirme jumysyn júrgizip kelgendigin, endigi sátte, Elbasynyń tarihi sheshimine orai toptyń aldaǵy atqarar jumys barysyna ózgerister engizilip, jańa qyrynan bastaý alatyndyǵyn da aitty.
