بۇل ەلىمىز ءۇشىن تاريحي ساتتەردىڭ ءبىرى دەسەك تە بولادى. وسى كۇندى حالقىمىز ۇزاق كۇتكەن بولاتىن. ەندى مىنە، سان عاسىر بويى ارمانداپ كەلگەن ءتول جازۋىمىزدى جاڭعىرتۋعا قول جەتكىزدىك.
«قازاق ءتىلى ءالىپبيىن لاتىن گرافيكاسىنا كوشىردىك، وسىمەن ءىس ءتامام دەمەۋىمىز كەرەك. مۇنى ءبىز جۇمىستىڭ باسى دەپ قابىلداۋىمىز قاجەت» – ءتىل سارايىندا وتكەن «جاڭا ءالىپبي – ۇلى ءداۋىر باستاۋى» اتتى جيىندا الماتى وبلىسىنىڭ تىلدەردى دامىتۋ جونىندەگى باسقارماسىنىڭ باسشىسى ايدار باشبايەۆ وسىلاي دەدى.
اسسامبلەيا وكىلدەرى، ارداگەرلەر، وبلىستىق باسقارما، «نۇر وتان» پارتياسىنىڭ وكىلدەرى، قازاق ءتىلىنىڭ ءالىپبيىن لاتىن گرافيكاسى نەگىزىندەگى الىپبيگە كوشىرۋ جونىندەگى جۇمىس توبىنىڭ مۇشەلەرى، ءتىل باسقارماسىنىڭ ماماندارى، «ءتىل» وقىتۋ-ادىستەمەلىك ورتالىعىنىڭ وقىتۋشىلارى جانە ب ا ق وكىلدەرى قاتىسقان جيىن بارىسىندا قازاق ءتىلى ءالىپبيىن كيريلليسادان لاتىن گرافيكاسىنا كوشىرۋ تۋرالى ماسەلەگە قاتىستى ويلار ورتاعا سالىندى.
– قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتىڭ لاتىن الىپبيىنە كوشۋ تۋرالى جارلىعىن قازاقستان رەسپۋبليكاسىنداعى ەڭ ۇلكەن وقيعانىڭ ءبىرى دەپ ايتساق بولادى. الەمنىڭ 90 پايىزى قولدانىپ وتىرعان الىپبيگە قازاقستاننىڭ دا كىرىگۋى ەلىمىز ءۇشىن زور مارتەبە. نەگىزىندە، ءبىز لاتىن ءالىپبيىن قولدانۋدى جاڭا باستاپ جاتقامىز جوق. ءبىزدىڭ اتا-بابالارىمىز وسى جازۋدى قولدانعانىن جاقسى بىلەمىز. ەندەشە، ەلباسىمىز وتكەندى قايتا جاڭعىرتۋ ارقىلى لاتىن ءالىپبيىنىڭ جاڭا نۇسقاسىن بەكىتتى. جاڭا ءالىپبي – ۇلى ءداۋىر باستاۋىنا اپارار سارا جول بولماق، – دەگەن باسقارما باسشىسى ايدار كاربوز ۇلى جاڭا ءالىپبيدى قولدانىسقا ەنگىزۋدە اتقارىلار جۇمىستار بويىنشا ەش كەدەرگىنىڭ بولمايتىنىن دا ايتتى.
مۇنان كەيىن قالالىق «تالدىقورعان» گازەتىنىڭ باس رەداكتورى دانيار سەيسەنبايەۆ ءسوز الدى. «جاڭا ءالىپبيدى ەنگىزە وتىرىپ ءبىز سانادا جاڭالىق جاسادىق. پرينسيپتىك تۇرعىدا ءالىپبيىمىزدى قابىلدادىق. بۇل ەلىمىزدىڭ رۋحاني جاڭعىرۋىنداعى جاڭا قادام دەپ ەسەپتەۋگە بولادى»، – دەگەن دانيار بولىسبەك ۇلى تالدىقورعان گازەتىنىڭ سوڭعى ەكى نومىرىنە جوبا رەتىندە بىرنەشە ماقالانى لاتىن ءالىپبيىنىڭ نۇسقالارىندا جازعاندىعىن ايتتى. بولاشاقتا دا وسى جۇمىستار قارقىندى تۇردە جالعاسىن تابادى دەدى.
«قازاق ءتىلى ءالىپبيىن لاتىن گرافيكاسىنا كوشىرۋدى – تاۋەلسىزدىكتىڭ جەمىسى ءارى جەتكەن جەڭىسى دەپ بىلەمىن»، – دەيدى وبلىستىق «جەتىسۋ» گازەتىنىڭ ءتىلشىسى ماۋلەن انەربايەۆ. –ەڭ باستىسى ءالىپبيىمىزدى قابىلدادىق. ال بولاشاقتا اتقارىلار جۇمىس شاش ەتەكتەن. سوندىقتان، بارلىقتارىڭىزدى جاڭا باستاماعا قولداۋ تانىتىپ، بىرىگىپ جۇمىس جاساۋعا شاقىرامىن، – دەدى ول.
جيىن بارىسىندا ءسوز العانداردىڭ دەرلىگى ەندى سوزبەن ەمەس، بىلەك سىبانىپ ءىس-قيمىل تانىتاتىن كەزەڭ كەلگەنىن ايتتى. سونداي-اق، مەملەكەتتىك ءتىلىمىزدى بۇكىل قوعامدىق سالادا ەركىن قولدانىلاتىن دارا، نەگىزگى، ءارى جۇمىستىڭ، ءارى قارىم-قاتىناستىڭ قۇرالىنا اينالدىرۋىمىز كەرەك دەگەن وي ءتۇيىستى.
جيىندى قورىتىندىلاعان قازاق ءتىلىنىڭ ءالىپبيىن لاتىن گرافيكاسى نەگىزىندەگى الىپبيگە كوشىرۋ جونىندەگى الماتى وبلىسى بويىنشا جۇمىس توبىنىڭ جەتەكشىسى ايدار كاربوز ۇلى وسىعان دەيىن توپ مۇشەلەرى ايماققا قاراستى توعىز اۋداندا بولىپ، حالىققا تۇسىندىرمە جۇمىسىن جۇرگىزىپ كەلگەندىگىن، ەندىگى ساتتە، ەلباسىنىڭ تاريحي شەشىمىنە وراي توپتىڭ الداعى اتقارار جۇمىس بارىسىنا وزگەرىستەر ەنگىزىلىپ، جاڭا قىرىنان باستاۋ الاتىندىعىن دا ايتتى.
