Jambyl oblysynda bir aialdamaǵa 16,8 mln teńge bólindi degen aqparattan keiin, Jýaly aýdany B.Momyshuly aýylynyń ákimi bul qarjynyń naqty nege jumsalatynyn túsindirdi, dep habarlaidy Dalanews.kz.
Aýyl ákimi Ratbek Kúsembaevtyń aitýynsha, atalǵan joba bir ǵana aialdamaǵa emes, eldi meken ishindegi birneshe nysandy qamtidy.
Onyń sózinshe, bul jaǵdai Jýaly aýdanyna qarasty Baýyrjan Momyshuly aýylynda oryn alǵan. Aýyl aýdan ortalyǵy bolǵandyqtan, turǵyndarǵa qolaily jaǵdai jasaý maqsatynda eldi meken ishinde birneshe aialdama salý josparlanǵan.
"Turǵyndardyń yńǵaiy úshin 33 avtobýs aialdamasy men 33 qoqys jáshigin ornatý qarastyrylǵan",- dedi ákim.
Sonymen qatar ol biyl qarjylandyrýdyń shekteýli ekenin atap ótti.
"Qarjy tapshylyǵyna bailanysty jumystar tórtinshi deńgeili biýdjet qarajaty esebinen júrgizilip jatyr", - dep túsindirdi ol.
Ákimniń aitýynsha, aýyl biýdjeti qymbat nysandardy ornatýǵa múmkindik bermeidi. Sondyqtan jergilikti qoǵamdyq keńespen aqyldasa otyryp, qoljetimdi nusqa tańdalǵan.
"Bizdiń biýdjet bir nysanǵa 4–5 mln teńge jumsaýǵa múmkindik bermeidi. Osyǵan bailanysty aýyl ákimi qoǵamdyq keńespen keńese otyryp, tiisti sheshim qabyldady", - dedi Kúsembaev.
Sondai-aq bir aialdama men oǵan qosa ornatylatyn qoqys jáshiginiń ortasha quny shamamen 509 myń teńgeni quraitynyn naqtylady.
Aita keteiik, buǵan deiin Jambyl oblysyndaǵy aýyldardyń birinde aialdama ornatýǵa 16,8 mln teńge bólingeni týraly jazǵan edik.
