Memleket basshysy Nursultan Nazarbaev ótken jylǵy 5-qazandaǵy halyqqa Joldaýynda «qarapaıym zattar ekonomıkasyn» qalyptastyrý boıynsha tapsyrma berip, halqymyzdyń azyq-túligin, kıimi men basqa da kúndelikti tutynatyn zattaryn óz elimizde óndirý kerektigine nazar aýdartqan bolatyn. Sol arqyly turǵyndardy jumyspen qamtyp, onyń turmysyn jaqsartýdyń mol múmkindigi aıtylǵan.
Osyǵan oraı búginde oblysymyzda tıisti sharalar qolǵa alynýda. Onyń mańyzdylyǵyn eskergen oblys ákimi Asqar Isabekuly óńir ekonomıkasyn kóterýdiń birden-bir tetigi retinde osy baǵytqa asa basymdyq berip otyr.
Jıynda óńir basshysy aldymen árbir eldi mekenderge taldaý júrgizip, áleýetin anyqtap alý kerektigin basa aıtty. Onyń ishinde aýyl turǵyndarynyń kóp tutynatyn ónimderi men qajet etetin qyzmet túrlerin zerdelep, soǵan oraı óndiris oryndaryn, shaǵyn sehtar, monsha, shashtaraz, tigin sheberhanalaryn ashýdyń tıimdiligine toqtaldy. Tıisti jobalardy aýdan, aýyldyq orkýg ákimdikterimen birlese otyryp, shynaıy málimet negizinde ǵana ázirleýdi qatań eskertti.
Asqar Isabekuly eldi mekenderde shaǵyn kásiporyndar ashý, kooperatıvter qurý arqyly jańa turaqty jumys oryndaryn qurýǵa, turǵyndar tutynatyn ónimniń ózindik qunyn tómendetý múmkindigine toqtaldy. Jobalardy irikteýde qajetti shıkizat kózi, mamandardyń tapshylyǵy, nesıelik jaǵdaılar da nazardan tys qalmaq emes.
Aıta keteıik, Elbasy Joldaýyndaǵy qarapaıym zattar ekonomıkasyn damytý mindeti boıynsha oblysta naqty jospar túzilýde. Tıisti jobalardy anyqtap, bekitý máseleleri kún saıyn qaralýda. Aldaǵy ýaqytta bekitilgen jobalar boıynsha aýdan ákimderimen jáne tıisti tulǵalarmen arnaıy jıyn ótip, naqty tapsyrmalar júkteletin bolady.
Jambyl oblysy ákiminiń baspasóz qyzmeti
