Jambyl oblysy politsiia departamentiniń bastyǵy Baqytjan Malybaev birqatar daýly oqiǵadan keiin qyzmetinen bosatyldy, dep habarlaidy Dalanews.kz.
“Jambyl oblysy PD burynǵy bastyǵy Malybaev B.A. bergen raportyna sáikes, ishki ister ministriniń buiryǵymen qyzmetinen bosatyldy”, – dep málimdedi seisenbi kúni IIM-niń baspasóz qyzmeti.
Malybaev Jambyl oblysynyń politsiiasyn 2024 jyldyń qyrkúieginen beri basqarǵan edi.
Buǵan deiin óńirlik politsiia departamentinde birqatar sybailas jemqorlyq janjaldary oryn aldy. Sonyń ishinde Jambyl oblysy politsiia bastyǵynyń orynbasary Jaidarbek Quttybaev alaiaqtyqqa qatysy bar degen kúdikpen ustaldy. Sonymen birge para alý deregine bailanysty taǵy bir qyzmetkerdiń ústinen is qozǵaldy.
Osy oqiǵalardyń aiasynda Malybaev raport jazyp, otstavkaǵa ketken. Al IIM Jambyl oblysyndaǵy politsiia qataryn "tazartý" jumystaryn bastap, "quqyq qorǵaý organdarynda satqyndarǵa oryn joq" dep málimdedi.
Paraqorlyq pen zańbuzýshylyq derekteri basqarmanyń bedelin kúrt túsirip, birneshe qyzmetkerdiń jumystan bosatylýyna jáne qylmystyq jaýapkershilikke tartylýyna alyp keldi.
Malybaevtyń eńbek joly
Baqytjan Malybaev 1969 jyldyń 23 shildesinde Jambyl oblysy Qordai aýdany Qyzyltas aýylynda dúniege kelgen. Ishki ister organdaryndaǵy qyzmetin 1990 jyly bastaǵan.
1990–2016 jyldar aralyǵynda ishki ister organdarynda orta jáne aǵa basshylyq quramyndaǵy túrli laýazymdarda qyzmet atqardy.
2016 jyldan – Astana qalasy IID jergilikti politsiia qyzmetiniń bastyǵy.
2018–2019 jyldary – Nur-Sultan qalasy politsiia departamenti bastyǵynyń orynbasary.
2019 jyldan – Astana qalasy politsiia departamenti bastyǵynyń birinshi orynbasary.
2022 jylǵy qarashadan 2024 jylǵy qyrkúiekke deiin – Kóliktegi politsiia departamentiniń bastyǵy qyzmetin atqardy.
2024 jyly 24 qyrkúiekte Jambyl oblysy politsiiasynyń basshysy bolyp taǵaiyndaldy.
Buǵan deiin
Eske sala keteiik, tamyz aiynyń sońynda Baqytjan Malybaevtyń burynǵy orynbasary zańǵa qaishy áreket jasady degen kúdikpen qamaýǵa alyndy.
Resmi habarlamada joǵary laýazymdy politseidi Ishki ister ministrliginiń ózindik qaýipsizdik departamenti qyzmetkerleri ustaǵany aitylǵan. Degenmen onyń naqty qandai quqyqbuzýshylyqqa barǵany ashyp kórsetilmegen.
“Kúdikti ýaqytsha ustaý izoliatoryna qamaldy. Qazirgi ýaqytta sotqa deiingi tergeý júrgizilýde. 2025 jylǵy 29 tamyzdaǵy ishki ister ministriniń buiryǵymen ol qyzmetinen teris sebeptermen bosatyldy”, – dep habarlady ministrliktiń baspasóz qyzmeti.
