جامبىل وبلىسى پوليسيا دەپارتامەنتىنىڭ باستىعى باقىتجان مالىبايەۆ ءبىرقاتار داۋلى وقيعادان كەيىن قىزمەتىنەن بوساتىلدى، دەپ حابارلايدى Dalanews.kz.
“جامبىل وبلىسى پد بۇرىنعى باستىعى مالىبايەۆ ب.ا. بەرگەن راپورتىنا سايكەس، ىشكى ىستەر ءمينيسترىنىڭ بۇيرىعىمەن قىزمەتىنەن بوساتىلدى”، – دەپ مالىمدەدى سەيسەنبى كۇنى ءىىم-نىڭ باسپا ءسوز قىزمەتى.
مالىبايەۆ جامبىل وبلىسىنىڭ پوليسياسىن 2024 جىلدىڭ قىركۇيەگىنەن بەرى باسقارعان ەدى.
بۇعان دەيىن وڭىرلىك پوليسيا دەپارتامەنتىندە ءبىرقاتار سىبايلاس جەمقورلىق جانجالدارى ورىن الدى. سونىڭ ىشىندە جامبىل وبلىسى پوليسيا باستىعىنىڭ ورىنباسارى جايداربەك قۇتتىبايەۆ الاياقتىققا قاتىسى بار دەگەن كۇدىكپەن ۇستالدى. سونىمەن بىرگە پارا الۋ دەرەگىنە بايلانىستى تاعى ءبىر قىزمەتكەردىڭ ۇستىنەن ءىس قوزعالدى.
وسى وقيعالاردىڭ اياسىندا مالىبايەۆ راپورت جازىپ، وتستاۆكاعا كەتكەن. ال ءىىم جامبىل وبلىسىنداعى پوليسيا قاتارىن "تازارتۋ" جۇمىستارىن باستاپ، "قۇقىق قورعاۋ ورگاندارىندا ساتقىندارعا ورىن جوق" دەپ مالىمدەدى.
پاراقورلىق پەن زاڭبۇزۋشىلىق دەرەكتەرى باسقارمانىڭ بەدەلىن كۇرت ءتۇسىرىپ، بىرنەشە قىزمەتكەردىڭ جۇمىستان بوساتىلۋىنا جانە قىلمىستىق جاۋاپكەرشىلىككە تارتىلۋىنا الىپ كەلدى.
مالىبايەۆتىڭ ەڭبەك جولى
باقىتجان مالىبايەۆ 1969 جىلدىڭ 23 شىلدەسىندە جامبىل وبلىسى قورداي اۋدانى قىزىلتاس اۋىلىندا دۇنيەگە كەلگەن. ىشكى ىستەر ورگاندارىنداعى قىزمەتىن 1990 جىلى باستاعان.
1990–2016 جىلدار ارالىعىندا ىشكى ىستەر ورگاندارىندا ورتا جانە اعا باسشىلىق قۇرامىنداعى ءتۇرلى لاۋازىمداردا قىزمەت اتقاردى.
2016 جىلدان – استانا قالاسى ءىىد جەرگىلىكتى پوليسيا قىزمەتىنىڭ باستىعى.
2018–2019 جىلدارى – نۇر-سۇلتان قالاسى پوليسيا دەپارتامەنتى باستىعىنىڭ ورىنباسارى.
2019 جىلدان – استانا قالاسى پوليسيا دەپارتامەنتى باستىعىنىڭ ءبىرىنشى ورىنباسارى.
2022 جىلعى قاراشادان 2024 جىلعى قىركۇيەككە دەيىن – كولىكتەگى پوليسيا دەپارتامەنتىنىڭ باستىعى قىزمەتىن اتقاردى.
2024 جىلى 24 قىركۇيەكتە جامبىل وبلىسى پوليسياسىنىڭ باسشىسى بولىپ تاعايىندالدى.
بۇعان دەيىن
ەسكە سالا كەتەيىك، تامىز ايىنىڭ سوڭىندا باقىتجان مالىبايەۆتىڭ بۇرىنعى ورىنباسارى زاڭعا قايشى ارەكەت جاسادى دەگەن كۇدىكپەن قاماۋعا الىندى.
رەسمي حابارلامادا جوعارى لاۋازىمدى پوليسەيدى ىشكى ىستەر مينيسترلىگىنىڭ وزىندىك قاۋىپسىزدىك دەپارتامەنتى قىزمەتكەرلەرى ۇستاعانى ايتىلعان. دەگەنمەن ونىڭ ناقتى قانداي قۇقىقبۇزۋشىلىققا بارعانى اشىپ كورسەتىلمەگەن.
“كۇدىكتى ۋاقىتشا ۇستاۋ يزولياتورىنا قامالدى. قازىرگى ۋاقىتتا سوتقا دەيىنگى تەرگەۋ جۇرگىزىلۋدە. 2025 جىلعى 29 تامىزداعى ىشكى ىستەر ءمينيسترىنىڭ بۇيرىعىمەن ول قىزمەتىنەن تەرىس سەبەپتەرمەن بوساتىلدى”، – دەپ حابارلادى مينيسترلىكتىڭ باسپا ءسوز قىزمەتى.
