Hokkeiden Qaraǵandy oblysynyń namysyn qorǵaityn áigili "Saryarqa" klýby sońǵy 15 jylda memleket biýdjetinen keminde 15 mlrd teńge alǵan. Qazir osy klýbtyń burynǵy direktory Arǵyn Nyǵmatýlinge "biýdjet qarjysyn jymqyrdy" degen aiyp taǵylyp, ol halyqaralyq izdeýde júr. Antikordyń málimetinshe, ol oblysta hokkei sportyn damytýǵa bólingen qarjyny talan-tarajǵa salǵan, dep habarlaidy Dalanews.kz.
"Saryarqa" qansha qarajat aldy?
- 2008–2018 jyldar aralyǵynda tenderlerdiń ashyq derekteri joq, degenmen bul kezeńde klýb biýdjetten turaqty qarjylandyrylyp otyrǵan.
- 2016 jyly klýb Qazaqstan men Resei chempionattaryna qatysý úshin 1,25 mlrd teńge alǵan.
- Sol jyly qosymsha taǵy 200 mln jáne 150 mln teńgeniń kelisimsharttary jasalǵan.
2017 jyly klýb eń iri tenderdi utyp, 2,5 mlrd teńgege kelisim jasasqan (resmi túrde 2,43 mlrd teńgesi igerilgen). - 2018–2022 jyldary klýbqa hokkei sportyn damytý maqsatynda taǵy 10,1 mlrd teńge bólingen.
- Al 2025 jylǵa Qaraǵandy oblysynyń biýdjetinen taǵy 1,2 mlrd teńge qarastyrylǵan.
"Saryarqa" tenderdi qalai ainalyp ótken?
Klýb biýdjetten bólingen qarajatty konkýrstan tys, tikelei kelisimsharttar arqyly alyp otyrǵan. 2017 jyly bólingen 2,5 mlrd teńgeniń, resmi qujat boiynsha, tek 1,3 mlrd teńgesi ǵana jumsalǵany kórsetilgen. Qalǵan aqshanyń qaida ketkeni belgisiz.
Al 2018 jyly "Saryarqa" klýby jeke basqarýǵa berilgen kezde, onyń quny resmi baǵasynan (161,1 mln teńge) alty ese qymbat baǵaǵa – 980 mln teńgege baǵalanyp ketken.
Arǵyn Nyǵmatýlin qalai paida tapty?
- Nyǵmatýlinniń menshigindegi "NBN Inc." kompaniiasyna tiesili Doszhan Sport muz aidyny Qaraǵandydaǵy Olimpiadalyq rezerv mektebine jalǵa berilip, 6 jyl ishinde kompaniia 1,04 mlrd teńge tabys tapqan.
- Sondai-aq, onyń biznes-aktivteri arasynda Itecco Kazakhstan jáne Future Generation kompaniialaryna tiesili qonaqúi keshenderi de bar.
- Budan bólek, Arǵyn Nyǵmatýlinge tiesili N.A.Z. sharýa qojalyǵy asyl tuqymdy jylqy men iri qara ósirýmen ainalysyp kelgen.
Osylaisha, áigili hokkei klýbynyń ainalasyndaǵy milliardtaǵan teńge men onyń burynǵy basshysyna qatysty qarjylyq bylyqtyń sońy halyqaralyq izdeýge deiin ulasyp otyr. Antikor qazir atalǵan qarajattyń naqty qalai jumsalǵanyn ári qarai tergep jatyr.
