Iran biligi 2026 jyldyń qańtarynda sharyqtaý shegine jetken úkimetke qarsy jappai narazylyqtarǵa qatysty degen aiyppen eki er adamnyń darǵa asylǵanyn habarlady. Bul týraly 19 shildede AFP jáne Fars agenttikteri málimdedi, dep habarlaidy dalanews.kz.
Ólim jazasy Erfan Esfandiari men Gol-Mohammad Mohammadige qatysty oryndalǵan.
Iran biliginiń málimetinshe, olar Isfahan qalasynda (Tegerannan ońtústikke qarai shamamen 340 shaqyrym jerde) politsiia qyzmetkerlerin jol belgisine arqanmen bailap, taspen jaraqattap, keiin ústine benzin quiyp, tiridei órtep jibergen. Sot organdarynyń málimdeýinshe, quqyq qorǵaý qyzmetkerleri qaza tapqannan keiin olardyń deneleri bólshektelgen.
Resmi nusqaǵa sáikes, bul oqiǵa videoǵa túsirilip, keiin sheteldik telearnalarǵa joldanǵan. Alaida málimdemede kúdiktilerdiń qashan ustalǵany, sot protsesi qashan ótkeni jáne olardyń jasy týraly aqparat jariialanbaǵan.
Irandaǵy jappai narazylyqtar
Iranda jappai narazylyqtar 2025 jyldyń jeltoqsan aiynyń sońynda bastalyp, bilik olardy kúshpen basty. Alǵashynda halyqtyń kóshege shyǵýyna ómir súrý qunynyń qymbattaýy sebep bolǵanymen, keiin narazylyqtar úkimetke qarsy aýqymdy sherýlerge ulasty. Eń qyzǵan kezeńi 2026 jyldyń 8–9 qańtaryna sáikes keldi.
Iran biligi tártipsizdikter kezinde 3 myńnan astam adamnyń qaza tapqanyn habarlap, oqiǵalardy AQSh pen Izrail uiymdastyrǵan «terroristik áreketterdiń» saldary dep baǵalady.
Al halyqaralyq quqyq qorǵaý uiymdary Irannyń qaýipsizdik kúshteri demonstranttarǵa oq atqanyn málimdegen.
Osy oqiǵalardan keiin AQSh prezidenti Donald Tramp Iranǵa qarsy áskeri aralasý múmkindigin eskertken. Keiin, 28 aqpanda AQSh pen Izrail Iran aýmaǵyna birlesken soqqy jasap, bul Taiaý Shyǵystaǵy soǵystyń bastalýyna túrtki boldy.
