Halyk Finance sarapshylary qazirgi ınflásıaǵa baılanysty jaǵdaılardy eksheı otyryp, osy aptada sheshim qabyldaýy tıis Ulttyq bank bazalyq mólsherleme kólemin qazirgi qalpynda, ózgerissiz qaldyrady dep sanaıdy. Olar retteýshi organ bıyl onsyz da monetarlyq saıasatty asyra kúsheıtkenin aıtady, dep habarlaıdy Dalanews.kz.

"Ulttyq Bank bıyl naýryzda bazalyq mólsherlemeni 15,25%-dan 16,5%-ǵa deıin ósirdi, al sáýirde ol ózgerissiz qaldy. Qazirgi ınflásıa jaǵdaıyn eskersek,bizdiń oıymyzsha, Ulttyq Bank bazalyq mólsherleme deńgeıinbul joly da ózgerissi, qazirgi kúıinde saqtap qalýy yqtımal. Bizdiń oıymyzsha, qazirgi jaǵdaıda joǵary bazalyq mólsherlemeni saqtaý anaǵurlym qolaıly kórinedi, óıtkeni el ekonomıkasyna baǵyttalmaq 8 trln teńge kólemindegi  jeńildetilgen qarjylandyrý túrindegi úkimettik baǵdarlama iske asyrylǵan jaǵdaıda ınflásıanyń kúsheıýi zańdy", - deıdi Halyk Finance Taldaý ortalyǵynyń sarapshysy Arsylan Aronov.

Onyń aıtýynsha, mamyr aıynda jyldyq ınflásıa deńgeıi 11,3%-ǵa deıin ósti, al sáýir aıynda bul kórsetkish 10,7%, naýryzda 10,0% boldy. 

Tutyný sebeti turǵysynan ınflásıany jedeldeýine qyzmetter (16,0%), azyq-túlik taýarlary (9,6%) jáne azyq-túlikke jatpaıtyn taýarlar (9,0%) baǵasynyń jyldyq ósimi yqpal etti. Biraq bir aı barysynda ınflásıa baıaýlap kele jatqanyn jáne mamyr aıynda ol 0,9%-dy (sáýirde - 1,2%, naýryzda - 1,3% jáne aqpanda - 1,5%) quraǵanyn ataı ketken jón.

Aqpan-naýryz aılarynda aılyq ınflásıanyń jedeldeýine yqpal etýshi negizgi faktorlar: qarasha-qańtar aılarynda teńgeniń aıtarlyqtaı álsireýi jáne halyqqa aqyly qyzmetterge, atap aıtqanda, memleket retteıtin jáne bazalyq mólsherlemeniń ózgerýine qatysty serpimdi emes TKSH qyzmetteri tarıfteriniń úzdiksiz ósimi oryn aldy.

"Alaıda,teńgeniń álsireý faktorlary jáne TKSH tarıfteriniń bir rettik ósiminiń ınflásıaǵa áseri alda tómendeıdi, al aılyq ınflásıa jyl sońyna qaraı anaǵurlym báseńdeı túsýi tıis", - deıdi sarapshy.

Jalpy, qalyptasqan úrdister baǵa dınamıkasynyń turaqtanýyn kórsetedi: bazalyq jáne maýsymdyq tazartylǵan ınflásıanyń qalypqa kelý belgileri baıqalady. Inflásıalyq kútýlerdi taldaý aralas kórinisti kórsetedi: eger halyqtyń aldaǵy bes jyldyqty qamtıtyn uzaq merzimdi kútýleri 14,3% - ǵa (naýryzda 13,5%) deıin ósse, al qysqa merzimdi kútýler naýryz aıynda 12,6% -dan 12,2% - ǵa deıin tómendegen eken.

"Osy jaǵynan alǵanda, aǵymdaǵy makroekonomıkalyq derekter men Qazaqstandaǵy ınflásıanyń boljamdy dınamıkasy negizinde Ulttyq Bank, bizdiń oıymyzsha, bazalyq mólsherleme deńgeıin aldaǵy otyrysta ózgerissiz qaldyrady. Sonymen qatar, biz mynandaı bir mańyzdy aspektige nazar aýdartqymyz keledi: Qazaqstannyń aǵymdaǵy ekonomıkalyq saıasatynda eki negizgi baǵyttyń arasynda aıqyn qaıshylyq baıqalady. Bir jaǵynan, úkimet ınflásıa ósimin yntalandyrýshy el ekonomıkasyna 8 trln teńge kóleminde jeńildetilgen qarjylandyrýdy qamtıtyn aýqymdy baǵdarlamany iske qospaq, al ekinshi jaǵynan, Ulttyq Bank ınflásıany tejeý úshin joǵary bazalyq mólsherlemeni qoldaýda. Bul sharalar bir-birine qarama-qaıshy, óıtkeni olardy bir ýaqytta qoldaný aqsha-nesıe jáne fıskaldyq salyq saıasatynyń tıimdiligin tómendetetin kóp baǵytty áserlerdi týdyrady. Jeńildetilgen nesıe baǵdarlamalary aqshalaı usynys pen jıyntyq suranysty arttyra otyryp, bıznes pen halyqty qoldaýǵa baǵyttalǵan. Degenmen, shekteýli óndiristik qýat pen tutynysqa joǵary beıimdilik jaǵdaıynda bul sózsiz ınflásıalyq qysymnyń artýyna ákeledi. Sonymen qatar, 16,5% mólsherleme nesıelendirýdi qymbatqa túsiredi, bul ekonomıkany salqyndatyp, ınflásıany báseńdetýi kerek. Bizdiń oıymyzsha, qazirgi jaǵdaıda joǵary bazalyq mólsherlemeni saqtaý anaǵurlym qolaıly", - deıdi Arsylan Aronov.

Aıta ketsek,"Sentras Sekúrıtız" sarapshylary da mamyr aıynda bazalyq mólsherleme sol kúıinde saqtalady dep bajaılaıdy.