Qazaqstanda jer qoinaýyn paidalanýshylardyń ǵylymi-zertteý jáne tájiribelik-konstrýktorlyq jumystarǵa arnalǵan mindetti aýdarymdaryn paidalaný tetigin jetildirý usynyldy. Qarjy ministrliginiń málimetinshe, 2026 jyldyń alǵashqy toǵyz aiynda osy maqsatqa 4,5 mlrd teńge túsken. Alaida qarajatty tiisti jobalardy qarjylandyrýǵa baǵyttaý máseleleri bar, dep habarlaidy dalanews.kz.
Áńgime jer qoinaýyn paidalanýshylardyń óndirý shyǵyndarynyń 1%-y mólsherinde ǵylymi-zertteý jáne tájiribelik-konstrýktorlyq jumystarǵa aýdarýǵa mindetti qarajaty týraly bolyp otyr.
Baiandamada bul qarajat ónerkásip pen el ekonomikasyna qajetti zertteýler men tehnologiialardy qoldaýǵa baǵyttalýy tiis ekeni atap ótildi. Alaida aqshanyń túsýinen bastap, naqty ǵylymi jobalardy qarjylandyrýǵa jáne nátijesin óndiriske engizýge deiingi tolyq tetik qalyptasýy qajet.
Osyǵan bailanysty Úkimetke mindetti aýdarymdardy paidalaný tártibin jetildirý usynyldy. Atap aitqanda, qarajatty bólek esepke alý jáne ǵylymi jobalardy ashyq konkýrstyq irikteý tetigin engizý qajettigi aityldy.
Sondai-aq Ǵylym jáne joǵary bilim ministrligi men Qarjy ministrligi qarjylandyrý men monitoringke jaýapty operator uiymdy aiqyndaýy kerek. Ony tańdaý kezinde qoldanystaǵy uiymdardyń múmkindikterin, ákimshilendirý shyǵyndaryn baǵalap, birdei fýnktsiialardyń qaitalanýyna jol bermeý usynyldy.
Ǵylymi aýdarymdardy eń aldymen óndirý men óńdeý tiimdiligin arttyrý, resýrstardy únemdeý, ónerkásiptik qaýipsizdik, ekologiia jáne óndiristik úderisterdi tsifrlandyrý baǵyttaryna jumsaý kózdelip otyr.
Baiandamada qarajattyń naqty jobalarǵa ýaqtyly jetýi jáne zertteý nátijeleriniń is júzinde qoldanylýy negizgi ólshem bolýy tiis ekeni atap ótildi.
