Almatyda tolassyz jaýǵan jańbyrdan keiin keibir kósheler men qoǵamdyq oryndardy sý basty. Áleýmettik jelide metro stantsiialarynyń biriniń kireberisine sý jinalǵany týraly aqparat tarady. Qalada kommýnaldyq qyzmetter kúsheitilgen rejimde jumys istep jatyr, dep habarlaidy dalanews.kz.
Áleýmettik jelide Almatydaǵy Alataý metro beketiniń kireberisin sý basqan video tarady.
Ákimdik qazirgi ýaqytta metro beketiniń kireberisi sýdan tazartylǵanyn málimdedi.
«Qazgidromet» RMK málimetinshe, 10 qarasha keshinen bastap Almatyda jańbyr jaýyp keledi. 11 qarasha saǵat 10:00-degi jaǵdai boiynsha qalada 23 millimetr jaýyn-shashyn túsken. Medeý aýdanynda bul kórsetkish 26 millimetrge, al Kamenskoe platosynda 36 millimetrge jetken.
Almaty qalasynyń Kommýnaldyq infraqurylym jáne turǵyn úi inspektsiiasy basqarmasynyń habarlaýynsha, tún ishinde qalanyń birneshe aýdanynda sý jinalǵan jerler tirkelgen. Qazir kommýnaldyq qyzmetter kósheler men aýlalardaǵy sý basý jaǵdailarynyń saldaryn joiýda.
Qolaisyz aýa raiynyń saldaryn joiý jáne aldyn alý úshin jalpy sany 1 579 adamnan turatyn 85 jedel brigada kezekshilikke shyqqan. Jumysqa 415 arnaiy tehnika men 97 motopompa jumyldyrylǵan. Sonymen qatar 2 950 qap qum daiyndalǵan.
Bir táýlikte 3 253 jol jumysshysy qyzmet atqaryp jatyr.
Almatyda jańbyr qashan toqtaidy?
Sinoptikterdiń boljamynsha, 11 qarasha kúni kúnniń sońyna deiin úzilispen jańbyr jaýady. Taǵy 10 millimetrge deiin jaýyn-shashyn túsýi múmkin. Jeldiń ekpini sekýndyna 15–20 metrge deiin jetedi dep kútiledi. Kúndiz aýa temperatýrasy +5…+7 gradýs bolady. Al 12 qarashada jaýyn-shashyn bolmaidy. Alaida tuman túsýi múmkin.
Osyǵan bailanysty qala turǵyndaryna jolda abai bolý, kólik jyldamdyǵyn tómendetý jáne avtokólikterdi sý jinalýy yqtimal jerlerge qoimaý usynyldy. Sondai-aq qatty jel kezinde aǵashtardyń astynda jáne jarnama qurylymdarynyń mańynda turmaýǵa keńes berildi.
