Almatynyń Túrksib aýdanynda dámhana, káýaphana, dúken jáne basqa da kommertsiialyq nysandardyń ielerimen túsindirý jumystary júrgizildi. Kásipkerlerge otyn, mangal paidalaný jáne aýany tazartý júielerine qoiylatyn talaptar eskertildi, dep habarlaidy dalanews.kz.
Almatynyń Ekologiia jáne qorshaǵan orta basqarmasy málimetinshe, mamandar birneshe qoǵamdyq tamaqtaný ornyna barǵan. Nysan ielerine kómir men otynnyń ornyna gaz nemese elektr jabdyqtaryn paidalanýǵa kóshý qajet ekeni aitylǵan.
Qatty otyn jaǵý kezinde aýaǵa tútin, kúie jáne ziian zattar taraidy. Bul jaqyn mańdaǵy turǵyn úilerde turatyn adamdardyń densaýlyǵyna keri áser etýi múmkin.
Sanitariialyq qaǵidalarǵa sáikes turǵyn úilerde jáne basqa da ǵimarattarda ornalasqan qoǵamdyq tamaqtaný oryndarynda qatty otynmen jumys isteitin mangaldar men tandyrlardy paidalanýǵa tyiym salynady. Taǵam daiyndaý úshin gaz jáne elektr jabdyqtary, sondai-aq, tútin men iisti súzgiden ótkizetin jeldetý júieleri qoldanylýǵa tiis. Qosymsha shekteýler Almaty máslihatynyń 2025 jyly 30 jeltoqsanda bekitken Atmosferalyq aýany qorǵaý qaǵidalarynda da kózdelgen.
Kásipkerlerge jyl sońyna deiin tabiǵi gazǵa kóship, ekologiialyq talaptardy saqtaý usynyldy.
Sonymen qatar, dámhanalardyń birine Almaty qalasyn kóriktendirý qaǵidalaryn buzǵany úshin QR Ákimshilik quqyqbuzýshylyq týraly kodeksiniń 505-baby boiynsha ákimshilik hattama toltyryldy. Aiyppul kólemi 20 AEK boldy.
2026 jyly 10 qarashadaǵy jaǵdai boiynsha qalada kóriktendirý qaǵidalaryn buzǵany úshin jalpy somasy 1 mln 211 myń teńge bolatyn 11 ákimshilik hattama toltyrylǵan. Olardyń qatarynda qoǵamdyq tamaqtaný oryndarymen birge basqa da saladaǵy uiymdar bar.
