Qazaqstanda túzeý mekemelerindegi sottalǵandardy azyq-túlikpen qamtamasyz etýge bólingen biýdjet qarajatyn jymqyrý deregi boiynsha tergeý bastaldy. Ulttyq qaýipsizdik komitetiniń Sybailas jemqorlyqqa qarsy qyzmeti Ishki ister ministrligine qarasty «Eńbek» memlekettik kásipornynyń basshylyǵyn ustady, dep habarlaidy dalanews.kz.
Ustalǵandar qatarynda kásiporyn direktory Ermek Shýrmanov pen azyq-túlikpen qamtamasyz etý basqarmasynyń basshysy Fýrkat Hýdaibergenov bar. Olar eldegi túzeý mekemelerinde jazasyn ótep jatqan azamattardy azyq-túlikpen qamtamasyz etýge jaýapty bolǵan.
Sybailas jemqorlyqqa qarsy qyzmet nusqasy boiynsha, kúdiktiler sottalǵandarǵa arnalǵan azyq-túlik qoryn paidalanyp, biýdjet qarajatyn jymqyrǵan bolýy múmkin.
Qaýipsizdik organdarynyń nazaryna túzeý mekemelerinen túsken shaǵymdar legi ilikken. Tekserý nátijesinde «Eńbek» RMK-da azyq-túlik jetkizýge qatysty kúmándi shema qurylǵany anyqtalǵan. Atap aitqanda, milliardtaǵan teńgeniń azyq-túlik jetkizilimi bir kompaniianyń qolyna shoǵyrlanyp, jasandy monopoliia qalyptasqan.
Munyń saldarynan azyq-túlik tapshylyǵy týyndap, túzeý mekemelerine sapasyz, tipti shirigen ónimder jetkizilgeni aitylyp otyr. Qazir kúdiktiler qamaýǵa alynǵan. Tergeý organdary memleketke keltirilgen zalaldyń naqty kólemin anyqtap jatyr.
Baqylaýshylardyń pikirinshe, IIM qurylymyndaǵy laýazymdy tulǵalardyń ustalýyn ministrlik pen onyń basshysy Erjan Sádenov úshin eleýli bedeldik soqqy dep baǵalaýǵa bolady.
«Qorǵansyz jaǵdaida otyrǵan adamdardy asyraýǵa bólingen biýdjet qarajatyn iemdenip, olarǵa sapasyz ónim berý onsyz da kúrdeli jaǵdaida turǵan koloniialardaǵy ahýaldy ýshyqtyrdy. Bul narazylyq pen búlik shyǵý qaýpin týdyrdy. Máseleni Ishki ister ministrliginiń óz qaýipsizdik qyzmeti emes, UQK-niń beiindi bólimshesi anyqtaǵany vedomstvo ishindegi baqylaý júiesiniń jaǵdaiyna qatysty kóp jaitty ańǵartady. Júie ishindegi laýazymdy tulǵalardyń biýdjet qarajatyn osyndai ashyq túrde jymqyrýy ministrlik basshylyǵynyń jeke jaýapkershiligi týraly máseleni kún tártibine shyǵarady», – dep jazady sholýshylar.
