Almatyda 12 jastaǵy Abylaihannyń ólimine qatysty jańa málimetter belgili boldy. Balany pyshaqtap óltirgen 13 jastaǵy jasóspirim qylmystyq jaýapkershilikke tartylmai, bir jylǵa arnaiy mektep-internatqa ornalastyrylǵan. Marqumnyń týystary bul sheshimge kelispei, zańnamany ózgertýdi talap etip otyr, dep habarlaidy dalanews.kz.
Qaiǵyly oqiǵa osydan bes ai buryn Almaty qalasynda bolǵan. Altynshy synypty aiaqtaǵan 12 jastaǵy Abylaihan eki oqýshy arasyndaǵy janjal kezinde qaza tapqan.
Jariialanǵan málimetke sáikes, jasóspirimge 16 ret pyshaq jaraqaty salynǵan. Aldyn ala aqparat boiynsha, eki oqýshy arasyndaǵy janjalǵa qyz balaǵa qatysty kelispeýshilik sebep bolǵan.
Alaida kúdikti oqiǵa kezinde 13 jasta bolǵandyqtan, qoldanystaǵy zańnamaǵa sáikes qylmystyq jaýapkershilikke tartylmaǵan.
Jasóspirim bir jylǵa arnaiy internatqa jiberildi
Basylymnyń habarlaýynsha, is qylmystyq sot talqylaýyna jetpei toqtatylǵan.
Oqiǵadan keiin jasóspirim tórt ai boiy psihiatriialyq meditsinalyq mekemede em qabyldaǵan. Keiin ol Semei qalasyndaǵy arnaiy mektep-internatqa bir jyl merzimge ornalastyrylǵan.
Sondai-aq onyń ata-anasyna 86 myń teńge kóleminde ákimshilik aiyppul salynǵany habarlandy.
Politsiia ókilderi qoldanystaǵy zań boiynsha asa aýyr qylmys jasady degen kúdikke ilingen adamnyń jasy 14-ke tolmasa, oǵan qylmystyq jaýapkershilik qoldanylmaitynyn túsindirgen.
«Nemeremniń ólimi úshin ádil jaza berilgen joq»
Marqum Abylaihannyń ájesi Saǵadat Ósenova qabyldanǵan sheshimge narazylyǵyn bildirdi.
Ol nemeresiniń ólimine qatysty jaǵdaidyń osylai aiaqtalǵanyna qynjylyp, kámeletke tolmaǵandardyń qylmystyq jaýapkershilik jasyna qatysty talaptardy qaita qaraýdy surady.
«Meniń itimdi óltirgendei bolyp kelip-ketti. Sonda qalai?! Sonda barlyǵy, 13 jastaǵy balalardyń barlyǵy 14-ke tolmadyq dep, óltire beredi me?! Sol bes aidyń ishinde men bilip otyrǵan tórt ólim bar. 13 jastaǵy bala óltirip ketip jatqan. Biz bilmegenimiz qansha?!» – dedi Saǵadat Ósenova.
Ájesiniń sózinshe, qoldanystaǵy quqyqtyq tártip nemeresinen aiyrylǵan otbasynyń ádildikke degen talabyn qanaǵattandyrmaǵan.
Advokat qylmystyq jaýapkershilik jasyn tómendetýdi usyndy
Jábirlenýshi taraptyń múddesin qorǵap júrgen advokat Arman Sháripov te zańnamadaǵy jas shekteýine bailanysty pikir bildirdi.
Onyń usynysy boiynsha, aýyr qylmys jasaǵan balalarǵa qatysty qylmystyq jaýapkershilik jasyn 12 jasqa deiin tómendetý máselesin qarastyrý qajet.
«Jaýapkershilikti 12 jastan bastap engizý kerek. Nege deseńiz, qazir balalar jasandy intelekt deimiz, internet deimiz, on eki jastaǵy bala eresek adamdardan da aqyldy. Olardyń órisi bizden de damyǵan. Olar qanshalyqty mynaý qoǵamǵa qaýipti ekenin, qaýipti emestigin bizden jaqsy biledi. On eki jastaǵy balalar qylmys jasaǵan bolsa, tiisti túrde jaýapqa tartylýy kerek», – dedi advokat.
Bul – jábirlenýshi tarap advokatynyń usynysy. Qazirgi ýaqytta Qazaqstanda atalǵan másele boiynsha zań ózgertilgeni týraly aqparat joq.
Marqumnyń otbasy kámeletke tolmaǵandardyń qylmystyq jaýapkershilik jasyn qaita qaraýdy talap etip, tiisti organdarǵa júginýge daiyndalyp jatyr.
Osylaisha, Abylaihannyń ólimine qatysty oqiǵa balalar arasyndaǵy zorlyq-zombylyqtyń aldyn alý jáne aýyr quqyq buzýshylyqtar úshin jaýapkershilik jasyn belgileý máselesin qaita kóterdi.
